Búgin QR Memlekettik hatshysy Qyrymbek Kósherbaevtyń tóraǵalyǵymen Shetelde kadrlar daiarlaý jónindegi respýblikalyq komissiianyń kezekti otyrysy ótti, dep habarlaidy QazAqparat.
«Qalyptasqan jumys kestesine sáikes, biz komissiianyń kezekti otyrysyna jinalyp otyrmyz. QR Tuńǵysh Prezidenti - Elbasy Nursultan Nazarbaevtyń usynysymen qabyldaǵan «Bolashaq« baǵdarlamasy elimizdiń adami kapitalyn damytý salasyndaǵy serpindi joba bolyp sanalady. Sheteldegi reitingi joǵary bilim berý mekemelerinde bilim alý kóptegen qazaqstandyqqa ózderiniń kásibi quziretteri men biliktiligin arttyrýǵa airyqsha múmkindik beretindigi sózsiz. Búgingi otyrystyń kún tártibinde 2 másele qaralady. Birinshi - konkýrstyq irikteýden ótken úmitkerlerge «Bolashaq« halyqaralyq stipendiiasyn taǵaiyndaý týraly, ekinshi - «Bolashaq« halyqaralyq stipendiiasynyń jekelegen ielerin odan aiyrý týraly», - dedi otyrysty ashqan Memlekettik hatshy.
Kelesi kezekte sóz alǵan QR Bilim jáne ǵylym ministri Ashat Aimaǵambetov el Úkimetiniń 2020 jyldyń 6 mamyryndaǵy 271 qaýlysymen bekitilgen «Bolashaq» halyqaralyq stipendiiasyn taǵaiyndaý boiynsha irikteýdiń jańa qaǵidalaryna sáikes, stipendiia taǵaiyndaýǵa qujattardy qabyldaý men konkýrstyq irikteý 27 shildeden bastap 30 qarashaǵa deiin ótetindigi jariialanǵanyn eske saldy.
«Biz alǵash ret konkýrstyq irikteýdegi keshendi tetileý men táýelsiz saraptamalyq komissiia múshelerimen suhbattasý prezidenttik jastar kadrlaryna irikteý úlgisi boiynsha tolyqtai avtomattandyryldy. Konkýrstyq irikteýdiń alǵashqy leginiń qorytyndysy boiynsha Shetelde kadrlar daiarlaý jónindegi respýblikalyq komissiianyń 2020 jylǵy 6 qyrkúiektegi sheshimimen 160 stipendiia taǵaiyndalǵan bolatyn. Endi qazirgi ýaqytta ekinshi legin daiyndap qoidyq. Konkýrstyq irikteýdiń ekinshi kezeńi 26 qyrkúiekten bastap 7 qazan aralyǵynda ótti. Táýelsiz saraptamalyq komissiia múshelerimen suhbattasý qorytyndysy boiynsha 55 úmitker stipendiia taǵaiyndaýǵa usynylyp, 4 úmitker usynylmady. Buǵan qosa, stipendiiaǵa usynylmaǵan úmitkerlerdiń arasynda suhbattasý nátijesi ortasha eseppen 3 baldan joǵary alǵan 2 úmitker bar. Alaida, táýelsiz saraptamalyq komissiia músheleriniń daýys berýi boiynsha olarǵa stipendiia usynylmaǵan. Biraq, zańnamaǵa sáikes, osy eki úmitker boiynsha sońǵy sheshimdi komissiia anyqtaidy. Sondyqtan osy máseleni bólek qarastyryp, 2 úmitkerge stipendiia taǵaiyndaýdy usynamyn», - dedi Ashat Aimaǵambetov.
