Kóshede azamattarǵa maskasyz júrgeni úshin aiyppul salǵan durys pa? Bul suraqqa Respýblikalyq arnaiy monitoring toby tóraǵasynyń orynbasary Rafael Gasanov jaýap berdi, dep habarlaidy QazAqparat.
Búgin Sybailas jemqorlyqqa qarsy is-qimyl agenttiginde Rafael Gasanovtyń qatysýymen baspasóz máslihaty ótti. Baspasóz máslihaty barysynda spikerge «Qazaqstannyń keibir óńirinde mobildi toptar (quramyndaǵy politsiia qyzmetkerleri arqyly) kóshede maskasyz júrgen azamattarǵa Ákimshilik kodekstiń 425-babyn negizge alyp, 40 myń teńgeden artyq aiyppul salǵan. Bul zańdy ma?» degen suraq qoiylǵan bolatyn.
Bul suraqqa jaýap bergen Rafael Gasanov eń aldymen eldegi búkil ákimdikterge úndeý joldady.
«Tyńdańyzdar! Jazalaýdan buryn preventsiiaǵa jumys isteý kerek. Adamdarǵa aldymen túsindirgen abzal. Suraq durys qoiylyp otyr. Óz basym azamattarǵa jónsiz aiyppul salyna bermeýi kerek dep esepteimin. Halyq aldymen salyq tólep otyr. Sol salyqtan olar (ákimdik qyzmetkerleri) ailyq alady. Iaǵni, halyqqa bas-kóz joq aiyppul sala bermei, jadynamalardy taratyp, túsindirme jumystaryn kúsheitken abzal. Bir sózben aqparattyq túsindirý jumysy jappai júrgizilýi kerek. Aldymen túsinik jazdyrý kerek, bolmasa bir ret eskertý jasaǵan durys», - deidi Rafael Gasanov.
Onyń aitýynsha qoǵamda shynynda da tártipti óreskel buzatyndar bar. Rafael Gasanov sonymen qatar bul oqiǵalardyń zańdylyǵyn anyqtaýǵa ýáde berdi.
«Ózimiz de el ishin aralap júrmiz. Tártipti óreskel buzǵan azamat sol memlekettik qyzmetshiniń ózine de aryz jazýy múmkin. Osy kezde araǵa qoǵam ókilderi kirýi kerek. Bárimiz adambyz ǵoi. Solai emes pe? Bul máseleniń kemshilikteri de, artyqshylyqtary da bar. Jazalaý ádisine salsaq, endeshe eldiń jartysyna aiyppul salaiyq. Bul aqymaqtyq bolar edi», - dedi Rafael Gasanov.
