Elimizdiń kóshbasshy jastary «Tsifrlyq Qazaqstan» baǵdarlamasynyń basym baǵyttarymen tanysty, dep habarlaidy QazAqparat tilshisi.
Aqmola oblysyndaǵy «Zeren» respýblikalyq jastar bilim lageriniń «Digital-urpaq» atty birinshi aýysymynyń jumysy jalǵasýda. Búgin birneshe baǵyt boiynsha treningter ótkizildi. Onyń ishinde elimizdiń ár óńirinen kelgen kóshbasshy jastar Qazaqstan damýynyń zamanaýi trendterimen tanysty.
«Men Astana Hub-ta birinshi kezekte damytylyp jatqan startap jobasyn alyp júrýshimin. Joba jetekshilerine ónimdi keskindeý jáne damytý boiynsha dittegen maqsattaryna jetýine, tiimdi nátije alý úshin olardyń jumystaryn baǵyttaý jáne úilestirýine kómektesemin. Bul bilim berý lageri qatysýshylarǵa «Zerde» holdingi arqyly júzege asyrylyp jatqan «Tsifrlyq Qazaqstan» membaǵdarlamasynyń negizgi basym baǵyttarymen jáne Qazaqstan damýynyń qazirgi zamanǵy trendterimen tanysýǵa múmkindik beredi», dep atap ótti «CRM Expert» kompaniiasynyń basshysy Asqar Tútikov.
Onyń sózinshe, trening kezinde jastar tsifrlandyrý qatysýshysy retinde jáne óziniń talantyn damytý jóninde aqparat alatyn bolady.
Eske sala keteiik, keshe Aqmola oblysynyń «Zeren» saýyqtyrý ortalyǵynyń bazasynda «Zeren» respýblikalyq jastar bilim lageriniń «Digital-urpaq» atty birinshi aýysymy resmi túrde ashylǵan bolatyn. Oǵan elimizdiń ár óńirinen kelgen jastar uiymdarynyń kóshbasshylary, jas kásipkerler, «Qazaqstannyń 100 jańa esimi» jobasynyń qatysýshylary quralǵan 300 jas qatysýda. Lager 12-26 tamyz aralyǵynda 3 taqyryptyq aýysymda ótkiziledi.
