Májilis tóraǵasy, Qasym-Jomart Toqaevtyń sailaýaldy shtabynyń jetekshisi Erlan Qoshanov televiziialyq debatqa Prezident nege qatyspaitynyn túsindirdi, dep habarlaidy Sputnik Qazaqstan agenttigi.
Májilis kýlýarynda jýrnalister Qoshanovtan 11 qarashada ótetin televiziialyq debatqa Toqaevtyń ózi nege qatyspaitynyn surady.
"Birinshiden, Prezident óz ókilettigin jalǵastyryp jatyr. Jumys kestesi óte tyǵyz. Prezident bolý degen - memlekettiń búkil taǵdyryna, ishki jáne syrtqy saiasatyna jaýap berý. Al syrtqy saiasat ta, ishtegi máseleler de úgit-nasihat júrgizýin kútip otyrmaidy. Ony ózińiz de bilesiz. Jaýapkershilik óte zor", - dedi Qoshanov.
Ekinshiden, onyń aitýynsha, debatqa sailaýaldy shtabtyń atynan kandidattyń senimdi ókiliniń qatysýy eshbir zańǵa qaishy kelmeidi.
Osy oraida BAQ ókilderi "Prezidenttiń jumys kestesi tyǵyz deisiz, al sonda sizdiń jumysyńyz joq pa? Parlamenttegi jumysyńyzdy kim atqarady?", - dep suraq qoiady.
"Men Parlamenttegi jumysymdy ózim atqaramyn. Men úshin eshkim ony atqarmaidy. Men - sol shtabtyń jetekshisimin, koalitsiia músheleri meni sailaǵan bolatyn. Sondyqtan men eki jumysqa da úlgerip júrmin. Óńirlerdi aralaǵan kezde aqysyz eńbek demalysyna shyqtym. Ol úshin maǵan Parlamentten de, shtabtan da eńbekaqy tólengen joq", - dedi Qoshanov.
Eske salsaq, kezekten tys Prezident sailaýy aldyndaǵy televiziialyq debat 11 qarashada "Habar" telearnasynda tikelei efirde keshki 20.00-de ótedi. Pikirsaiystyń uzaqtyǵy keminde 80 minýt.
Televiziialyq debatqa prezidenttikke kandidat Qasym-Jomart Toqaev qatyspaidy, onyń atynan senimdi ókili Erlan Qoshanov sóz sóileidi. Al qalǵan kandidattar pikirtalasqa ózderi keledi.
Aita keteri, debatty uiymdastyrýǵa 63 million teńge jumsalmaq.
