Qos qyzyn oqýǵa túsirmek bolǵan aqtóbelik sheneýnik qyzmetine qaita oralýdy oilap otyr. Búgin №2 Aqtóbe qalalyq sotynda osyǵan qatysty azamattyq is qaraldy, dep habarlaidy Ult.kz tilshisi QazAqparat agenttigine silteme jasap.
Oblystyq densaýlyq saqtaý basqarmasy basshysynyń burynǵy orynbasary Almat Ermaǵambetov qyzdaryn Nazarbaev ýniversiteti men Nazarbaev mektebine túsirmek bolyp, «Azeri Medikal» JShS direktory Botagóz Biekenovaǵa 7 million teńgeden astam aqsha bergen bolatyn. Qazirgi kúni B. Biekenova «Alaiaqtyq» baby boiynsha sot aldynda jaýap berip jatyr. Al memlekettik qyzmetkerdiń bul áreketi buqaralyq aqparat quraldary arqyly tarap, keiin isti Ádep keńesinde qaraldy. Ádep keńesiniń jumystan shyǵarý týraly uiǵarymyn oblystyq densaýlyq saqtaý basqarmasy buljytpai oryndaǵan. Bul sheshimge aryzdanýshy Almat Ermaǵambetov kelispei, búgin №2 qalalyq sotta azamattyq is qaraldy. Almat Ermaǵambetov jumysqa qaita ornalasýdy talap etip otyr.
«Almat Ermaǵambetov 24- qarasha kúni aqysyz demalysqa shyǵý týraly aryz jazdy. Onyń aryzy qanaǵattandyrylǵan. Al 25- qarasha kúni Ádep keńesine shaqyrylyp, sol jerde ony jumystan shyǵarý týraly uiyǵarym beriledi. Jumystan tek basshy shyǵara alady. Sondyqtan biz Memlekettik qyzmet isteri jáne sybailas jemqorlyqqa qarsy is-qimyl agenttiginiń, Ádep keńesin jaýapker retinde qarastyrmaimyz. Talapker Ermaǵambetov oblystyq densaýlyq saqtaý basqarmasy negizsiz jumystan shyǵardy dep esepteidi. Sebebi, ol qyzdaryn ýniversitet pen mektepke túsirýge emes, arnaiy kýrstan ótýge aqsha berdi. Al ol qyzmet aqyly. Qazirgi ýaqytta onyń jubaiy bala kútimimen úiinde otyr. Tabys kózi bolmaǵan soń jumys ornyna qaitaryp, jumystan qalǵan kúnderine ailyǵyn esepteýdi suraimyz», - dedi qorǵaýshy Raýshan Iztileýova.
Eske sala ketsek, oblystyq densaýlyq saqtaý basqarmasy Ermaǵambetovti 6-jeltoqsan kúni jumystan shyǵaryp jibergen.
«Ermaǵambetovtyń jumys ornyn qaitarý týraly aryzyn negizsiz dep esepteimiz. Ol oblystyq densaýlyq saqtaý basqarmasy basshysynyń orynbasary qyzmetinde 2014 jyldyń aqpanynan bastan jumys istedi. Memlekettik qyzmetker jumysqa kirisken kezde ol sybailas jemqorlyqqa ákeletin kez kelgen isten qashyq júrýge kelisim beredi. Bul talap oryndalmaǵan. Sol sebepti Ádep keńesiniń uiǵarymy tolyq oryndalyp, ol qyzmetinen ketti», - dedi oblystyq densaýlyq saqtaý basqarmasynyń zańgeri Qýanysh Aijigitov.
Memlekettik qyzmet isteri jáne sybailas jemqorlyqqa qarsy is-qimyl agenttiginiń, Ádep keńesi «Memlekettik qyzmet týraly» Zańnyń «Memlekettik qyzmetshilerge qyzmettik ádepti saqtaý boiynsha qoiylatyn talaptar» babyn saqtamaǵan degen sheshimge keldi. Iaǵni, Ermaǵambetov memlekettik qyzmetke kir keltiretindei áreketter jasaýǵa jol bermeýi tiis edi. Bul onyń qolynan kelmei, qylmystyq iste 7 million teńgeni daýlap otyr. Aita keteiik, Almat Ermaǵambetov qazirgi kúni eki is boiynsha sotta jaýap beredi. Birneshe adamdy aldap, 17 million teńgeden astam aqshany jymqyrǵan Botagóz Biekenovanyń isinde ol jábirlenýshi. Azamattyq iste ol talapker.
