قوس قىزىن وقۋعا تٷسٸرمەك بولعان اقتٶبەلٸك شەنەۋنٸك قىزمەتٸنە قايتا ورالۋدى ويلاپ وتىر. بٷگٸن №2 اقتٶبە قالالىق سوتىندا وسىعان قاتىستى ازاماتتىق ٸس قارالدى, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
وبلىستىق دەنساۋلىق ساقتاۋ باسقارماسى باسشىسىنىڭ بۇرىنعى ورىنباسارى المات ەرماعامبەتوۆ قىزدارىن نازارباەۆ ۋنيۆەرسيتەتٸ مەن نازارباەۆ مەكتەبٸنە تٷسٸرمەك بولىپ, «ازەري مەديكال» جشس ديرەكتورى بوتاگٶز بيەكەنوۆاعا 7 ميلليون تەڭگەدەن استام اقشا بەرگەن بولاتىن. قازٸرگٸ كٷنٸ ب. بيەكەنوۆا «الاياقتىق» بابى بويىنشا سوت الدىندا جاۋاپ بەرٸپ جاتىر. ال مەملەكەتتٸك قىزمەتكەردٸڭ بۇل ەرەكەتٸ بۇقارالىق اقپارات قۇرالدارى ارقىلى تاراپ, كەيٸن ٸستٸ ەدەپ كەڭەسٸندە قارالدى. ەدەپ كەڭەسٸنٸڭ جۇمىستان شىعارۋ تۋرالى ۇيعارىمىن وبلىستىق دەنساۋلىق ساقتاۋ باسقارماسى بۇلجىتپاي ورىنداعان. بۇل شەشٸمگە ارىزدانۋشى المات ەرماعامبەتوۆ كەلٸسپەي, بٷگٸن №2 قالالىق سوتتا ازاماتتىق ٸس قارالدى. المات ەرماعامبەتوۆ جۇمىسقا قايتا ورنالاسۋدى تالاپ ەتٸپ وتىر.
«المات ەرماعامبەتوۆ 24- قاراشا كٷنٸ اقىسىز دەمالىسقا شىعۋ تۋرالى ارىز جازدى. ونىڭ ارىزى قاناعاتتاندىرىلعان. ال 25- قاراشا كٷنٸ ەدەپ كەڭەسٸنە شاقىرىلىپ, سول جەردە ونى جۇمىستان شىعارۋ تۋرالى ۇيىعارىم بەرٸلەدٸ. جۇمىستان تەك باسشى شىعارا الادى. سوندىقتان بٸز مەملەكەتتٸك قىزمەت ٸستەرٸ جەنە سىبايلاس جەمقورلىققا قارسى ٸس-قيمىل اگەنتتٸگٸنٸڭ, ەدەپ كەڭەسٸن جاۋاپكەر رەتٸندە قاراستىرمايمىز. تالاپكەر ەرماعامبەتوۆ وبلىستىق دەنساۋلىق ساقتاۋ باسقارماسى نەگٸزسٸز جۇمىستان شىعاردى دەپ ەسەپتەيدٸ. سەبەبٸ, ول قىزدارىن ۋنيۆەرسيتەت پەن مەكتەپكە تٷسٸرۋگە ەمەس, ارنايى كۋرستان ٶتۋگە اقشا بەردٸ. ال ول قىزمەت اقىلى. قازٸرگٸ ۋاقىتتا ونىڭ جۇبايى بالا كٷتٸمٸمەن ٷيٸندە وتىر. تابىس كٶزٸ بولماعان سوڭ جۇمىس ورنىنا قايتارىپ, جۇمىستان قالعان كٷندەرٸنە ايلىعىن ەسەپتەۋدٸ سۇرايمىز», - دەدٸ قورعاۋشى راۋشان ٸزتٸلەۋوۆا.
ەسكە سالا كەتسەك, وبلىستىق دەنساۋلىق ساقتاۋ باسقارماسى ەرماعامبەتوۆتٸ 6-جەلتوقسان كٷنٸ جۇمىستان شىعارىپ جٸبەرگەن.
«ەرماعامبەتوۆتىڭ جۇمىس ورنىن قايتارۋ تۋرالى ارىزىن نەگٸزسٸز دەپ ەسەپتەيمٸز. ول وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى قىزمەتٸندە 2014 جىلدىڭ اقپانىنان باستان جۇمىس ٸستەدٸ. مەملەكەتتٸك قىزمەتكەر جۇمىسقا كٸرٸسكەن كەزدە ول سىبايلاس جەمقورلىققا ەكەلەتٸن كەز كەلگەن ٸستەن قاشىق جٷرۋگە كەلٸسٸم بەرەدٸ. بۇل تالاپ ورىندالماعان. سول سەبەپتٸ ەدەپ كەڭەسٸنٸڭ ۇيعارىمى تولىق ورىندالىپ, ول قىزمەتٸنەن كەتتٸ», - دەدٸ وبلىستىق دەنساۋلىق ساقتاۋ باسقارماسىنىڭ زاڭگەرٸ قۋانىش ايجٸگٸتوۆ.
مەملەكەتتٸك قىزمەت ٸستەرٸ جەنە سىبايلاس جەمقورلىققا قارسى ٸس-قيمىل اگەنتتٸگٸنٸڭ, ەدەپ كەڭەسٸ «مەملەكەتتٸك قىزمەت تۋرالى» زاڭنىڭ «مەملەكەتتٸك قىزمەتشٸلەرگە قىزمەتتٸك ەدەپتٸ ساقتاۋ بويىنشا قويىلاتىن تالاپتار» بابىن ساقتاماعان دەگەن شەشٸمگە كەلدٸ. ياعني, ەرماعامبەتوۆ مەملەكەتتٸك قىزمەتكە كٸر كەلتٸرەتٸندەي ەرەكەتتەر جاساۋعا جول بەرمەۋٸ تيٸس ەدٸ. بۇل ونىڭ قولىنان كەلمەي, قىلمىستىق ٸستە 7 ميلليون تەڭگەنٸ داۋلاپ وتىر. ايتا كەتەيٸك, المات ەرماعامبەتوۆ قازٸرگٸ كٷنٸ ەكٸ ٸس بويىنشا سوتتا جاۋاپ بەرەدٸ. بٸرنەشە ادامدى الداپ, 17 ميلليون تەڭگەدەن استام اقشانى جىمقىرعان بوتاگٶز بيەكەنوۆانىڭ ٸسٸندە ول جەبٸرلەنۋشٸ. ازاماتتىق ٸستە ول تالاپكەر.
