Búginde el arasynda tanylyp úlgergen daryndy jastar kóp. Onyń ishinde janyna poeziiany, prozany serik etken talanttar da bar. Sondai jastardyń biri – erli-zaiypty aqyndar Elaman Tóleýtai men Rysgúl Dosjanova. Biri Soltústikten, biri Shyǵystan kelip Túrkistan shaharynda bilim alǵan jastar, búginde osy qalada qyzmet etip júr, – dep habarlaidy «Ult aqparat».
Aqyndardy tanystyratyn baǵdarlamaǵa qonaq bolǵan jastar ózderiniń mahabbat hikaialary men poeziia jolyndaǵy syrlarymen bólisti.
«Oqýshy kezimizden jas aqyndarǵa arnalǵan músháiralardan bir-birimizdiń esimimizdi jaqsy biletinbiz. Bir kúni meniń ustazym bir shákirtin baiqaýǵa alyp barǵanda, sol baiqaýǵa Rysgúl de qatysypty. Jón surasqan soń, «Elaman degen aqyndaryńyzdyń óleńderin oqyp turamyn, sálem aityńyz» degen eken. Ustazymyz aityp kelgende, arnaiy sýretterin kórip, unatyp qaldym. Ol kezde «agentpen» jazysatyn kez edi. Ony taýyp alyp, «men saǵan ǵashyq bolyp qaldym, sen de maǵan ǵashyq bolasyń áli» dep jazyp jiberdim», – dep kúle eske aldy aqyn Elaman Tóleýtai.
«Sensiz maǵan ómir bos,
Ǵumyr ada...
Shaǵylysyp júregiń shuǵylaǵa -
Beisapardan qaitarda, Shyǵys qyzy,
Qarsy jaqtan jolyqtyń qubylaǵa...
Kúreń ińir seiilip, qoshqyl ymyrt,
Eskegimen ómirdiń estik úmit.
...Eki júrek aiqastyq – eki qushaq,
Qiyrynda ǵaryshtyń qos tigilip...».
Dál osylai Shyǵystyń qyzyn jyrǵa qosyp júrgende Taraz qalasynda ótken jas aqyndar baiqaýyna qos aqyn da qatysady. Elaman ózi armanadaǵan arýdy kórý úshin uiymdastyrýshylardan onyń ornalasqan jerin surap, qustai ushady.
«Rysgúlder bizden buryn jetip, qonaq úige jaiǵasypty. Men jete sala uiymdastyrýshylardan olardyń ornalasqan jerin surap, qolyma bir qushaq gúlimdi alyp, tún jarymynda jetip bardym. Bólmesin de bilip alǵam ǵoi. Esiginiń aldyna baryp óleń oqyp turdym. Rysgúl oianyp, qasyma keldi. Alǵashqy kezdesýimiz osylai boldy. Men ony ábden daiyndalǵan, boianǵan túrin emes, uiqydaǵy túrin kórip kezdestim alǵash ret», – deidi Elaman.
«Men ushqym keledi.
Men ushaqpen de ushyp kórmegem.
Meni ushyrsa, qinalady jer neden?!
Bir bosatyp, ushyryp jiberer em
Keýdemdegi yza - kekti kernegen.
Kenetten qusqa ainalyp ushar bolsam,
O, dúnie!
Basqa keńistik.
Basqa dem.
Aspanǵa qarai birden zaýlap ushyp,
Qus tumsyǵymmen bultty mamyqtarsha shashyp tastar em!....
Sosyn, aspan bulttanbaityn bolady».
Bul aqynnyń jary, jas aqyn Rysgúl Dosjanovanyń óleńi. Jastardy tabystyrǵan da, qaýyshtyrǵan da Túrkistan qalasy bolypty.
«Bir qyzyǵy Elaman ekeýimiz de Ahmet Iasaýi atyndaǵy Halyqaralyq qazaq-túrik ýniversitetine oqýǵa tústik. Búginde Túrkistan telearnasynda baǵdarlamalar bóliminde jumys isteimin. Birneshe baǵdarlamany tikelei efirde júrgizemin. Sondyqtan shyǵar, jumystyń áserinen keide kóp óleń jaza bermeimin. Meniń janym tynyshtyqta otyryp óleń jazǵandy qalaidy. Ony qarbalas jumyspen aralastyra almaimyn. Munda bizdi jyly qabyldady. Aqyndar aralasatyn óz ortamyz bar. «Aqynǵa jar bolý ońai emes» degen pikir qalyptasqan bizdiń qoǵamda. Al eki aqyn qosylsa, múlde bólek sezim», – deidi Rysgúl Dosjanova.
«Meniń de ǵashyǵym bar,
Súiýge qaýiptenem.
Aqyndy shaqyryńdar,
"Súiýdi baqyt" degen...
Tózbeseń, osalmyn de.
Alynbas shyń qamaldar.
Mahabbat – bos áńgime.
Meni de tyńdamańdar...»
Rysgúldiń osyndai lirikaǵa toly jylary qyz janyn, áiel zatyn túsinýge bir qadam bolsa da jaqyndata túsedi. Mahabbat kez kelgen adamnyń júregin terbep ótse, al aqynnyń júregin órtep ótetin kórinedi.
Aita keteiik, jas aqyndar Elaman Tóleýtai men Rysgúl Dosjanova erli-zaiypty. Biri Soltústikten, biri Shyǵystan kelip Túrkistan shaharynda bilim alǵan jastar, búginde osy qalada qyzmet etip júr.
