Búgin Qaraǵandy oblysynyń qylmystyq ister boiynsha mamandandyrylǵan aýdanaralyq sotynda qoryqshy Erlan Erlan Nurǵalievti óltirgenderge qatysty sot úkimi shyqty, dep habarlaidy QazAqparat.
Erlan Nurǵalievti óltirý áreketine qatysty sot tyńdaýy Qaraǵandyda 2019 jyldyń tamyz aiynda bastaldy. Qylmystyq is 40 tomnan turady, tyńdaýǵa 80-nen astam kýáger qatysty. Sottalýshylar oryndyǵynda Berik Ahmetov, Nurlan Shúkildikov jáne Qairat Aqshanov otyrdy.
Osyǵan deiingi sot tyńdaýynda prokýror barlyq úsh aiyptalýshyǵa ómir boiyna bas bostandyǵynan aiyrý jazasy berilsin, ony aiypkerler qaýipsizdigi erekshe koloniiada ótesin dep suraǵan bolatyn.
Qylmystyq ister jónindegi mamandandyrylǵan aýdanaralyq sotynyń sýdiasy Qairat Qasymov prokýrordyń talap-aryzyn qanaǵattandyryp, sot úkimimen Berik Ahmetov, Qairat Aqshanov jáne Nurlan Shúkildikulynyń ómir boiy bas bostandyǵynan aiyrý jazasyna kesilgendigin aitty.
Osy iske qatysy bar taǵy tórt azamat: Berden Bazarov, Batyrbek Qaiyrbekov, Jarashan Myrzabaev jáne Aidos Ákimovke qatysty qylmystyq isti sotqa deiingi tergeý organdary toqtatqan bolatyn. Alaida Erlan Nurǵalievtiń balasynyń advokaty ekijaqty pikirtalas barysynda bul sheshimmen kelispeitinin, osyǵan bailanysty jeke qaýly shyǵaryp, qylmysty jasyrý men ol týraly quzyrly organdarǵa der kezinde habar bermeý baby boiynsha qylmystyq tergeýdi qaita bastaýdy suraǵan bolatyn.
Osylaisha, joǵaryda atalǵan 4 azamat 6 jylǵa bas bostandyǵynan aiyryldy. Olar kinásin qylmystyq atqarý júiesiniń qaýipsizdigi ortasha mekemesinde óteitin bolady.
Osyǵan deiingi otyrysta jábirlenýshi tarapynyń qorǵaýshysy 20 mln. teńge moraldyq shyǵyn jáne 9 million 137 myń 600 teńge kóleminde materialdyq shyǵyn keltirilgenin atap ótti. Sonymen qatar, sottalýshylarǵa 17 aqbóken úshin ótemaqy tóleýge týra keledi – bul 89 million teńge.
7 azamattyń barlyǵyn sot zalynan alyp ketti.
Esterińizge sala keteiik, 13 qańtarda Teńiz kólinen ońtústik-batys baǵytta ornalasqan «Aq qoshqar» bógetiniń mańynda «Ohotzooprom» memlekettik kásipornynyń inspektorlary Nitsyk pen Nurǵaliev bes aqbókendi óltirgen brakonerlerdiń izine túsken bolatyn. Kóp uzamai olar memlekettik nómiri joq eki jol talǵamaityn kólikti qýyp jetken.
Izderine túskenin baiqaǵan kóliktegiler jasyrynýǵa tyrysqan, biraq olardyń bireýi toqtaýǵa májbúr bolǵan. Brakonerler inspektorlarǵa shabýyl jasap, onyń sońy tóbeleske ulasqan. Oqiǵa saldarynan Erlan Nurǵaliev oqtan jaralanyp, aýyr bas súiek-mi jaraqatyn alǵan – qoryqshy qaitys boldy. Shabýyldaýshylar onyń áriptesi Petr Nitsyktiń jaǵyn syndyryp, birneshe pyshaq jaraqatyn salǵan. Qylmyskerlerge qashyp úlgergen.
