Álem elderi bul kúnde shybyndai jannyń esendigi úshin baryn salyp arpalysyp jatyr. Qytaidan bas alǵan «aty jaman» indettiń álemniń ár turǵynyn uiqy-kúlkiden aiyryp, alańdaýly kúige túsirer dep bes-alty ai buryn eshkim de oilaǵan joq.
Qazaq balasy «kóppen kórgen uly toi» degendi kóbinde jaqsylyqqa jori aitatyn. Ókinishke qarai kóppen birge kórer qiynshylyq bizdiń de eldiń basyna túsken syn saǵatta El Prezidenti men Úkimet músheleriniń uiqy-kúlki kórmei jurtymyzdyń bas amandyǵyna jasap jatqan qimyl-áreketteri júregimizdegi úmit shoǵyn úrlei túskenine qýandyq!
Árine, el basshylary men qairatker tulǵalardyń tynymsyz áreketi men qosa jalpyhalyqtyń yntymaqqa ymyralasyp, judyryqtai jumylǵany qajet! Aqparattyq keńistiktiń tym erkindigi de «qoryqqanǵa qos kórinetin» ýaqytta halyqtyń úreiin ushyrýǵa beiil-aq. Tártiptiń temirdei qattylyqqa kóshkenine moiynusynyp, berekeniń kelekege ainalmaýyn ár qazaqstandyq azamat bilýge jáne saqtaýǵa tiisti ekenin, óz densaýlyǵymen qatar Ult qaýipsizdiginiń kepili bolaryn bilgen jón. Taǵdyrdyń talai ashy dámin tatqan, basynan ótkergen aty jaman oba men tyrysqaqty da jeńip, ashtyq pen qastyqty da kórgen Alash balasy bul bulaǵai kúnderdi de artqa tastaitynyna kóńil sener.
Tuńǵysh Prezident – Elbasy da el-jurtty berekege shaqyryp, ultym deitin Azamattarǵa tastap jatqan jaýapty da saýapty úndeýi – kósheli Ult kóseminiń kórgendi de kóregen saiasatkerligi! Osy rette bir adamnyń jaýapkershiligin atam qazaq «jalǵyz qýrai – jel jarar» dep beinelep aitqan eken. Mamyrajai kúnde mai kekirip otyryp toilar toi-tomalaqty da doǵara turýǵa sabyr-shydamymyz jetetin el emes pe edik?! Karantin rejimin sál bosańsytqanǵa japatarmaǵai ashyq-shashyqtyqqa kóshýge áli erte ekenin eskertken El úkimetiniń sózin qulaqqa nege ilmeimiz?! «Qoryqqanǵa qos kórinetin» ýaqytta bázbireýlerdiń «kórshiniń órtengen shóbine bas, siraq úitip» alǵysy keletin pasyq piǵylyna ere ketýge jol bermesek eken. Alańǵa shyǵyp, attan salyp aiǵailaǵannan ulttyń túgendeler upaiyn kórip turǵan joqpyn. Qysyltaiań shaqta qulaq sarsytar qańqý sózge ere ketý – órkenietti qoǵam ókiliniń tirligi emes ekenin túsiner óremiz qaida?! «El búlinip, Ertis buzylǵan joq»! Mán-maǵynasyz «beibit sherýletip», dál osy tusta aiǵaiǵa súren qosyp, aitaqqa úre jónelerdei esh negiz joq sekildi. Sol «alań ańsaǵan» aǵaiyndardyń myna pandemiialyq jaǵdaida jalpy kóptiń densaýlyǵyna kepildik bere almaityny bes eneden belgili. Tym bolmaǵanda atyń óshkir indettiń aýyzdyqtalýyna árqaisymyzdyń jaýapkershilikpen qaraýǵa sana-sezimimiz jetpese sol, Eldigimizge úlken syn!
Tipti, álemdi ábigerge túsirgen juqpaly dertke qoǵam arasynda áli kúnge senbeitinderdiń qarasy kóbeigeni janyńdy qynjyltatyny ras. Dúnie júzin alańdatqan, sharýasyn shatqaiaqtatqan pandemiiadan saiasi astar izdeýdiń kókirek kózi ashyq qazaq balasyna uiattylaý da tirlik ekeni janyńdy aýyrtady. Memlekettik shekarań shegendelip, kók aspanda qyran qanatty bairaǵyń jelbirep turǵanda qara aspandy tóndirý, jańbyr jaýmai sý bolý – qanshalyqty aqylǵa syiymdy?!
Keide «at shapqanǵa it shapqan» tirlikti doǵara almai qalatyn elmiz be deimin. Yntymaqty ydyramai turyp oilaǵan ata-baba urpaǵy emes pe edik, samaýryn tasyǵanyn Samarqandy sý aldy dep estitin enjar qulaqtyq dál bizdiń ult ókilderine jaraspas?!
«Qoryqqan boiǵa qut» degen atam qazaq! Berekeniń buzylýynan qorqaiyq, jaman indettiń el ishine keń jaiylýynan qorqaiyq! El Prezidenti Qasym-Jomart Kemeluly salqynqandy saiasatker retinde alys-jaqyn elderdiń pandemiialyq apatpen kúresýdiń ozyq tájiribelerine súiene otyryp, eldegi jaǵdaidy barynsha halqymyzǵa tiimdi jaqta qarastyryp, tiisti tapsyrmalar men shekteýlerdi qolǵa alǵany kókeige qonymdy is boldy. Endi osy naqty sharalardyń oń nátijelerin kórýimiz úshin judyryqtai jumylǵanymyz abzal bolar. Sanaly halyq ókili retinde ár otandastyń azamattyǵy men ary synǵa túsken shaqta taǵy da «malyń menen janyńdy sadaǵa dep, ardyń týyn kótergen» Alash balasynyń berekege uiyp, tártipke baǵynyp, kesapattyń qaqpan tilin baspaityndyǵyna senip, jamandyqty amandyq jeńetinin jarqyn kúnderge birge jeteiik, Túnderińiz tynysh, kúnderińiz mamyrajai bolsyn, Alash balasy!
Dáýletkerei Kápuly
Aqyn, QR Eńbek sińirgen qairatkeri.
