Aqordada Qazaqstan prezidenti Nursultan Nazarbaev elimizde tirkelgen sheteldik diplomatiialyq korpýs ókilderimen kezdesti.
«Biylǵy jyldyń naýryz aiynda Astanada ótken Ortalyq Aziia memleketteri basshylarynyń birinshi konsýltativtik kezdesýinen keiin óńiraralyq yqpaldastyq edáýir jandandy. Aimaqtaǵy elderdiń barlyq prezidentteri qysqa merzim ishinde ózara saparlar almasyp, kezdesýler ótkizdi. Qazirgi tańda memleketter arasynda ekijaqty saýda isine qatysty kedergilerdiń bári joiyldy. Ózbekstan memleketi keiingi kezde óz kórshilerimen kópten beri rettelmei kelgen shekara máselesin sheshti. Shielenisip ketken jaǵdai Tájikstanmen bolǵan. Ol másele sheshildi. Qyrǵyzstanmen aradaǵy másele de sheshimin tapty. Olardyń rettelmei kele jatqan shekara máselesi de sheshilip, qarym-qatynas jandanyp, jalpy bizdiń Ortalyq Aziiadaǵy ál-ahýal túzelip, saýda-sattyq jyldan-jylǵa ósip keledi. Kórshi elder arasynda senim artty, saýda kólemi kóbeidi. Qarym-qatynastyń barlyǵy jaqsardy dep aitýǵa bolady. Kólik qatynasy ońtailanyp, jańa áýe, temir jol baǵyttary ashyldy. Júieli túrde biznes jáne óńiraralyq forýmdar ótkizilip, birikken saýda úileri men jańa óndiris oryndary iske qosylýda. Bir jyldyń ishinde ǵana Qazaqstan men Ózbekstan arasyndaǵy saýda aýqymy 2 ese kóbeiip, 3 mlrd dollarǵa jetti. Jaqyn arada 5 mlrd dollarǵa jetkizemiz degen maqsat qoiyp otyrmyz», - dedi Nazarbaev jiynda.
Elbasy Ortalyq Aziia elderi arasynda shekara máselesine qatysty jumystar belsendi júrgizilgenin aitty. Atap aitqanda, ótken jyly Qazaqstan Túrikmenstanmen, Qyrǵyzstanmen memlekettik shekarany demarkatsiialaý jónindegi kelisimge qol qoiyp, osy eldermen aradaǵy shekarany rásimdeý jumystaryn túgeldei aiaqtaityn bolady. Sonymen, Qazaqstannyń tóńiregindegi barlyq shekaralar quqyqtyq jóninen óz sheshimin taýyp otyr. Sondai-aq, 2017 jyly Qazaqstan, Túrikmenstan, Ózbekstan shekaralarynyń túiisý núktesi jónindegi de shart jasaldy.
«Jaqynda biz qujatty ratifikatsiialadyq. Buǵan qosa, Astanadaǵy jiynnyń qorytyndysy boiynsha Ortalyq Aziia memleketteri basshylarynyń kezdesýin turaqty túrde ótkizý týraly sheshim qabyldandy. Endigi jyly sáýir aiynda bul kezdesý Tashkentte ótedi. Sodan keiin jyl saiyn kezdesý bolyp turady dep kelistik», - dedi Nursultan Nazarbaev.
