Jyl basynan beri koronavirýs infektsiiasyna qatysty jaǵdaidyń ýshyǵýy álem elderin alańdatyp otyrǵany belgili. Sáikesinshe, tiisti shekteý sharalaryn qabyldaýdyń arqasynda indettiń taralýyn aitarlyqtai tejeý múmkin boldy. Osy oraida búgin Densaýlyq saqtaý ministrliginiń resmi ókili Baǵdat Qojahmetov koronavirýsqa qarsy kúrestiń nátijeleleri jaiynda baiandady.
«QR Densaýlyq saqtaý ministrliginiń resmi ókili retinde apta saiyn elimizdegi epidemiologiialyq ahýal jóninde jáne halyqqa kórsetilip jatqan meditsinalyq járdem týraly aqparat berip turatyn bolamyz. Sonymen qatar, indetke qarsy kúrestiń nátijeleleri jaiynda baiandaimyn», - dedi Baǵdat Qojahmetov.
Osy oraida ol ministrliktiń atyna kelip túsetin aryz-shaǵymdarǵa jedel jaýap berýge ázir ekendikterin atap ótti.
«Baspasóz májilisinde qoiylatyn suraqtardan bólek, meniń jeke paraqshama jiberilgen suraqtardy, áleýmettik jelide aitylatyn saýaldardyń barlyǵyn qamtýǵa tyrysamyz», - dedi resmi ókil.
Sonymen qatar ol Qazaqstanda koronavirýsty juqtyrý ósimi toqtaǵanyn jetkizdi. El boiynsha jaǵdai aitarlyqtai jaqsardy. Atqarýshy bilik ahýaldy qatań baqylaýda ustap otyr. Meditsinalyq qaýymdastyqtyń sanitarlyq-epidemiologiialyq qyzmeti ózine júktelgen mindetin tolyq kólemde oryndap jatyr.
«Osylaisha, elimiz eń kúrdeli kezeńdi artta qaldyrdy desek bolady. Biraq jetken jetistikke qýanyp, bosańsýǵa bolmaidy. Endigi mindetimiz – indetti juqtyrý men ólim-jitimdi toqtatý. Osy rette barsha qazaqstandyqtarǵa sanitarlyq erejelerdi oryndaýǵa shaqyramyn», - dedi B. Qojahmetov.
Resmi statistikaǵa keletin bolsaq, biylǵy 13 naýryzynan bastap Qazaqstanda koronavirýstyq infektsiiamen 99 442 adam aýyrdy. Jazylyp shyqqan naýqastardyń sany 72 523 nemese 72,9 paiyz. Statsionarlarda 4 713 adam em qabyldaýda jáne 20 937 ambýlatorlyq jaǵdai emdelýde.
Naýqastardyń arasynda 246 adamnyń densaýlyǵy nashar, 69 adamnyń densaýlyǵy óte nashar dep baǵalandy. Jalpy 70 naýqas ókpeni jasandy jeldetý apparatynda jatyr. Sońǵy bir táýlikte COVID-19 virýsyn 741 adam juqtyrdy.
«Dúniejúzilik densaýlyq saqtaý uiymynyń usynysy boiynsha 1 tamyzdan bastap koronavirýstyq infektsiia jáne oǵan uqsas belgileri bar pnevmoniia derekterin statistika qataryna qostyq. Osydan keiin elimiz indettiń taralýy kórsetkishi boiynsha álemdik reitingte bir satyǵa ǵana kóterildi. Buǵan deiin biz 27-shi oryda bolsaq, qazir 26-shy orynǵa turaqtadyq. Biraq, bul kórsetkishke qarap jigerdi jasytýǵa bolmaidy, biz úshin eń mańyzdysy – kúresti kúsheitip, jaǵdaidy odan ári jaqsartý», - dedi Baǵdat Qojahmetov.
Aita keteiik, naýryz aiynan bastap balalardyń koronavirýs infektsiiasyn juqtyrýdyń 2 257 jaǵdaiy tirkeldi. Onyń ishinde qazirgi kezde Qazaqstan aýrýhanalarynda 114 bala jatyr.
Vedomstvo málimetine qaraǵanda, karantinniń 5 aptasynda, osy shilde aiynyń basynan beri aýrýhanalardaǵy oryndar 60 paiyzǵa bosady. Onyń ishinde jansaqtaý saqtaý bólimindegi oryndar 58 paiyzǵa deiin bosap otyr. Jedel járdemge habarlasý aitarlyqtai azaidy, KVI boiynsha 68 paiyzǵa tómendedi. Qabyldanǵan keshendi sharalardyń nátijesinde jazylyp shyqqan naýqastardyń sany 73 paiyzǵa ósti.
Emhanada dári tegin berilmek
«Qabyldanǵan sharalardyń nátijesinde qazir qolymyzda jan-jaqty saralanǵan málimetter bar. Bul bizge bolashaqqa jospar quryp, aldyn ala daiyndalýda múmkindik beredi. Iaǵni, indettiń kúzde kútiletin jańa tolqynyna qarsy turý úshin materialdy ári adami resýrstardy tolyǵymen daiyndaýǵa jaǵdai jasaldy», - dedi Baǵdat Qojahmetov Ortalyq kommýnikatsiialar qyzmetindegi baspasóz máslihatynda.
Atap aitqanda, provizorlyq ortalyqtarda jedel áreket etý úshin meditsinalyq qyzmetkerlerdi daiyndaýdan bólek, dári-dármektermen tolyqtyrý boiynsha aýqymdy jumys atqarylýda. Koronavirýspen jáne KVI-ǵa uqsas belgileri bar pnevmoniiamen syrqattanǵan naýqastar úshin aldyn ala bir ailyq qorǵa eseptelingen preparattar satyp alyndy. Qazirgi ýaqytta óńirlerge 8,7 mlrd teńge bolatyn 91 túrli dári-dármek jóneltildi. Bul ortasha eseppen 40 myń naýqasqa jetedi.
Onyń sózine qaraǵanda, 15 tamyzdan bastap taǵy eki aiǵa jetetin qor ázirlenedi. Statsionardaǵy 200 myń naýqasqa jetetin dári-dármektiń 50 túri qamtylmaq.
«Sonymen qatar, ambýlatorlyq jaǵdaida em alatyn bir million naýqasty emdeýge arnalǵan dári-dármektiń 5 túrin satyp alý úrdisi aiaqtalýda. Dál osyndai aýqymdy sharalar alǵashqy ret qabyldanyp otyr. Syrqattanyp, virýs juqtyrý boiynsha kúdiktenseńiz, tirkelgen emhanaǵa baryp qaralsańyz bolady. Eger virýs juqtyrǵanyńyz anyqtalsa, burynǵydai dárihana jaǵalap júrmei-aq qoiyńyzdar! Barlyq emhanalarda qajetti dári-dármek bar jáne aqysyz beriledi.
Atap aitqanda, paratsetamol, ibýprofen jáne basqa da qajetti preparattar aptanyń sońyna deiin elimizdiń barlyq emhanalaryna jetkiziledi. Dári-dármekterdi jetkizý «SQ-Farmatsiia» kompaniiasy tarapynan júrgizilip jatyr», - dedi ol.
