Álemdi alańdatqan qaýipti indettiń ekinshi tolqyny keledi dep boljanýda. Osy oraida búginde elimizde qaýipsizdik sharalaryn kúsheitý, karantin talaptaryn qatańdatý isi qolǵa alyna bastady. Sondai-aq indetke qarsy dári-dármek de qory jinalyp jatyr, dep habarlaidy QazAqparat.
«Buryn dári-dármekti jetkizý áýehaby arqyly 2 aptaǵa deiin ýaqyt alatyn, búginde jetkizý qyzmeti jedeldetildi. Qazir kez kelgen qoimaǵa 1 kúnniń ishinde jetkizý múmkindigi bar. Elordadaǵy qoimada 4 mlrd teńgeniń dári-dármegi bar, onyń ishinde 400 mln teńgeniń preparaty ol koronavirýs dertine arnalǵan. Qazirgi ýaqytta meditsinalyq uiymdar 110% qamtamasyz etilip otyr. Bizge meditsinalyq uiymdardy 1 ailyq dári-dármek qorymen qamtamasyz etý tapsyryldy. Sol úshin de kún saiyn dári-dármek qory jańartylyp otyrady», - dedi «SQ-Farmatsiia» JShS-nyń basqarma tóraǵasy Erhat Esqaliev atalǵan uiymda ótken reid barysynda.
Onyń aitýynsha, búginde satyp alynǵan dári-dármektiń 60% eldegi 4 habqa taratyldy.
«Biz dári-dármekterdi barlyq óńirlerge birden taratyp jibere almaimyz. Sebebi óńirlerdegi qoimalardyń aýmaǵy 300 sharshy metrdi quraidy, bul degenimiz bar joǵy 2 júk kólik dári-dármek. Al keibir óńirlerde dári-dármekti saqtaityn qoima joq, sondyqtan da júk kólikteri meditsinalyq uiymdarǵa tikelei jetkizip beredi. Búginde meditsinalyq uiymdardyń suranysyn óteýden bólek, bizdiń qoimada 2 aiǵa jetetin dári-dármek qory bar. Óńirlerge júk kólikteri tynym tappai kúndelikti jetkizip otyr», - dedi ol.
Atalǵan mekemeniń resmi deregine súiensek, qazirgi ýaqytta COVID-19 indetine arnalǵan 8,2 mlrd teńgeni quraityn 44 ataýly dári-dármek satyp alynýda.
Aita ketsek, Antikor qyzmetkerleri qoǵam belsendilerimen birge elordadaǵy SQ Farmatsiia JShS qoimasyndaǵy dári-dármek qoryna qatysty monitoring júrgizdi.
