Koronavirýstyń ekinshi tolqyny birshama jeńil ótedi. Bul týraly Ulttyq qoǵamdyq densaýlyq saqtaý ortalyǵy direktorynyń birinshi orynbasary, epidemiolog Baýyrjan Júsipov aitty, dep habarlaidy QazAqparat.
«Koronavirýs indetiniń negizgi tolqynyn ótkizdik» degen pikirdegi adamdarmen kelisemin. Bizde negizgi tolqyn osy jyldyń maýsym-shilde ailarynda boldy. Muny bizge qoljetimdi statistikaǵa, aýrýhanaǵa jatqyzý derekterine qarap aita alamyz. Degenmen tirkelgen statistikalyq málimetter shynaiy jaǵdaidy kórsete almaidy. Menińshe, mundai jait búkil álemde birdei. Kóktemde naýqastardy tirkegen kezde jeńil jáne simptomsyz formasyna, ortasha aýyr jáne aýyr formasyna qatysty múlde basqa ara qatynasty baiqaǵan edik. Buǵan qosa, ortasha jáne aýyr formamen aýyrǵandardyń sany basym boldy. Koronavirýsqa shaldyǵýdyń shyrqaý sheginen ótkenimizdi bildiretin taǵy bir jait - ókpe qabynýynyń óte kóp bolýy. Onyń ústine qazir Densaýlyq saqtaý ministrligi bul ókpe qabynýlaryn kovid dep sanap, tirkeýge qosyp otyr. Iaǵni, ókpe qabynýylary PTR-diagnostikalaý kómegimen anyqtalǵan edi», - dedi ol koronavirýstyń ekinshi tolqynyń júrý múmkindigin talqylaýǵa arnalǵan onlain jiynda.
Onyń atap ótýinshe, koronavirýs indetiniń shyrqaý sheginen ótip ketýimiz aldaǵy ýaqyttaǵy jaǵdaiǵa oń áserin tigizedi.
«Óitkeni, endi immýnitettiń bar ekendigin bilemiz. Koronavirýsty qaitalap juqtyryp alý derekteri biren-saran ǵana. Onyń ózi de aǵzanyń ereksheligine, immýnitettiń qalyptasýyna bailanysty. Jalpy, immýnitet bar. Osyny eskerer bolsaq, koronavirýstyń ekinshi tolqyny birshama jaidaq ótedi. Iaǵni, maýsym-shildedegidei kúrt órshimeidi. Biz de, Densaýlyq saqtaý ministrligi de, jalpy qoǵam da daiyn bolady. Jeltoqsanǵa qarai ol kúrdelene túsedi. Qyrkúiek pen qazan ailary birshama tynysh ótedi», - dedi Baýyrjan Júsipov.
