كوروناۆيرۋستىڭ ەكٸنشٸ تولقىنى بٸرشاما جەڭٸل ٶتەدٸ. بۇل تۋرالى ۇلتتىق قوعامدىق دەنساۋلىق ساقتاۋ ورتالىعى ديرەكتورىنىڭ بٸرٸنشٸ ورىنباسارى, ەپيدەميولوگ باۋىرجان جٷسٸپوۆ ايتتى, دەپ حابارلايدى قازاقپارات.
«كوروناۆيرۋس ٸندەتٸنٸڭ نەگٸزگٸ تولقىنىن ٶتكٸزدٸك» دەگەن پٸكٸردەگٸ ادامدارمەن كەلٸسەمٸن. بٸزدە نەگٸزگٸ تولقىن وسى جىلدىڭ ماۋسىم-شٸلدە ايلارىندا بولدى. مۇنى بٸزگە قولجەتٸمدٸ ستاتيستيكاعا, اۋرۋحاناعا جاتقىزۋ دەرەكتەرٸنە قاراپ ايتا الامىز. دەگەنمەن تٸركەلگەن ستاتيستيكالىق مەلٸمەتتەر شىنايى جاعدايدى كٶرسەتە المايدى. مەنٸڭشە, مۇنداي جايت بٷكٸل ەلەمدە بٸردەي. كٶكتەمدە ناۋقاستاردى تٸركەگەن كەزدە جەڭٸل جەنە سيمپتومسىز فورماسىنا, ورتاشا اۋىر جەنە اۋىر فورماسىنا قاتىستى مٷلدە باسقا ارا قاتىناستى بايقاعان ەدٸك. بۇعان قوسا, ورتاشا جەنە اۋىر فورمامەن اۋىرعانداردىڭ سانى باسىم بولدى. كوروناۆيرۋسقا شالدىعۋدىڭ شىرقاۋ شەگٸنەن ٶتكەنٸمٸزدٸ بٸلدٸرەتٸن تاعى بٸر جايت - ٶكپە قابىنۋىنىڭ ٶتە كٶپ بولۋى. ونىڭ ٷستٸنە قازٸر دەنساۋلىق ساقتاۋ مينيسترلٸگٸ بۇل ٶكپە قابىنۋلارىن كوۆيد دەپ ساناپ, تٸركەۋگە قوسىپ وتىر. ياعني, ٶكپە قابىنۋىلارى پتر-دياگنوستيكالاۋ كٶمەگٸمەن انىقتالعان ەدٸ», - دەدٸ ول كوروناۆيرۋستىڭ ەكٸنشٸ تولقىنىڭ جٷرۋ مٷمكٸندٸگٸن تالقىلاۋعا ارنالعان ونلاين جيىندا.
ونىڭ اتاپ ٶتۋٸنشە, كوروناۆيرۋس ٸندەتٸنٸڭ شىرقاۋ شەگٸنەن ٶتٸپ كەتۋٸمٸز الداعى ۋاقىتتاعى جاعدايعا وڭ ەسەرٸن تيگٸزەدٸ.
«ٶيتكەنٸ, ەندٸ يممۋنيتەتتٸڭ بار ەكەندٸگٸن بٸلەمٸز. كوروناۆيرۋستى قايتالاپ جۇقتىرىپ الۋ دەرەكتەرٸ بٸرەن-ساران عانا. ونىڭ ٶزٸ دە اعزانىڭ ەرەكشەلٸگٸنە, يممۋنيتەتتٸڭ قالىپتاسۋىنا بايلانىستى. جالپى, يممۋنيتەت بار. وسىنى ەسكەرەر بولساق, كوروناۆيرۋستىڭ ەكٸنشٸ تولقىنى بٸرشاما جايداق ٶتەدٸ. ياعني, ماۋسىم-شٸلدەدەگٸدەي كٷرت ٶرشٸمەيدٸ. بٸز دە, دەنساۋلىق ساقتاۋ مينيسترلٸگٸ دە, جالپى قوعام دا دايىن بولادى. جەلتوقسانعا قاراي ول كٷردەلەنە تٷسەدٸ. قىركٷيەك پەن قازان ايلارى بٸرشاما تىنىش ٶتەدٸ», - دەدٸ باۋىرجان جٷسٸپوۆ.
