Jańa koronavirýs saldarynan qaza tapqandar sany sársenbi kúni 490-ǵa jetti, – dep habarlaidy Reuters agentti.
Koronavirýstan alǵashqy adam mert bolǵanyn estigennen keiin amerikalyq eki áýe jelisi Gonkongqa ushýyn toqtatty. Japondyq krýiz kemesinde 10 adam virýs juqtyrǵany anyqtaldy. Keme qazir karantinde.
Qytaidyń Densaýlyq saqtaý ulttyq komissiiasynyń habarlamasyna sáikes, seisenbi kúni 65 adam mert bolyp, qurlyqtaǵy qaza tapqandardyń jalpy sany 490-ǵa jetti. Olardyń kópshiligi virýs paida bolǵan Ýhan qalasy men onyń aimaǵynda tirkeldi.
Qytaidan basqa elderde jańa koronavirýstan eki adam kóz jumǵan. Seisenbi kúni Gonkongta virýs oshaǵyna ainalǵan Ýhan qalasyna barǵan 39 jastaǵy azamat qaitys boldy. Taǵy bir er adam Ýhan qalasyna barǵannan keiin Filippinde mert boldy. Qytaidyń qurlyqtyq bóliginde virýs juqtyrǵan 3 887 adam tirkelip, jalpy indetti juqtyrǵandar sany 24 324 adamǵa jetti.
Japoniia Densaýlyq saqtaý ministrliginiń málimetinshe, Iokogama portynda karantinde turǵan krýiz kemesiniń 10 jolaýshysynda koronavirýsqa tapsyrǵan test oń nátije kórsetken. Myńdaǵan adam men ekipaj múshelerin meditsinalyq tekseristen ótkizý jalǵasyp jatqandyqtan bul kórsetkish ulǵaiýy múmkin.
Qazirgi ýaqytqa deiin 273 adam tekserilip, onyń 31-i kúdikti dep tanylyp, 10-y indetti juqtyrǵany rastaldy. Carnival Corp (CCL.N) kemesiniń bortynda 3700 jolaýshy men ekipaj músheleri bar.
DDSU taǵy 24 el men aimaqtarda 176 adam indetti juqtyrǵanyn málim etti.
