Meditsinalyq maskany taǵý aýrýǵa shaldyqqan adam men dárigerge ǵana kerek. Bul týraly koronavirýstyq infektsiianyń ákelinýi men taralýynyń aldyn alý maqsatynda ótken brifingte aityldy, dep habarlaidy QazAqparat.
«DDSU jáne koronavirýs boiynsha jumys isteitin uiymdar bul derten qorǵanýdyń eń basty amaly maska taǵý emes ekenin aitady. Sebebi bul aýada ushyp juǵatyn aýrý emes. Eń bastysy - jeke bas gigienasyn durys saqtaý kerek», - deidi Balalar juqpaly aýrýlar kafedrasynyń meńgerýshisi, professor Dinagúl Baeshova.
Onyń aitýynsha, meditsinalyq maska aýrý adam túshkirgen kezde silekeiin shashpaýy úshin jáne naýqastarmen jumys isteitin meditsinalyq qyzmetkerlerge kerek.
«Bul jaǵdaida qasyńda turǵan adamnan ózińdi kem degende eki metr alys ustaýyń kerek. Eger aýyrǵan adamǵa óte jaqyn tursańyz, sizdi meditsinalyq maska qutqarmaidy. Ony koronavirýs infektsiiasyn aldyn alý úshin qoldanýǵa bolady. Ońtústik Koreiada dúkende kezekte turǵan adamdar meditsinalyq maska taqqanymen, bir-birine óte jaqyn ornalasqan. Ózderińiz kórip otyrǵandai, sonyń saldarynan aýyrǵandar sany kúrt ósip keledi. Virýs jaqyn bailanys bolǵan kezde juǵajy. Jasandy dúrligý jaǵdaiyn týdyrýdyń qajeti joq», - deidi ol.
Sondai-aq, professor koronavirýstan saqtaný joldaryn aitty.
«Koronavirýs 60-70 ystyq temperatýra jaǵdaiynda birden ólip qalady, sol sebepti shiki azyq-túlik tutynbańyzdar. Aldymen ystyq sýmen jýyp alý kerek. Qoldy jii jýý qajet», - deidi ol.
