Halyqtyń memleketke degen senimin arttyrý mindeti COVID-19-ǵa qarsy kúres strategiiasynyń bir bólshegine ainalýy qajet. Bul pikirdi QR Prezidenti janyndaǵy Qazaqstan strategiialyq zertteýler institýty direktorynyń orynbasary Sabina Sádieva bildirdi, dep habarlaidy QazAqparat.
«Koronavirýs pandemiiasymen kúrestiń jarty jylynan keiin sarapshylar alǵashqy qorytyndylaryn shyǵara bastady – kim, qai memleket jáne ult COVID-19 qaterin jeńip shyǵa aldy? Alǵashqy qorytyndylarǵa súiensek, «tiptik emes pnevmoniia» epidemiiasyn ótkergen elderdiń tájiribesi koronavirýspen kúrestegi jetistikte mańyzdy boldy (SARS, 2003 jyl, infektsiianyń taralýy boiynsha baqylaý sharalarymen toqtatyldy). Al jetistiktiń mańyzdylyǵy boiynsha ekinshi faktor – senim boldy. Pandemiia jaǵdaiynda virýstyń taralýyna tosqaýyl qoiýdyń jetistigi tikelei memlekettik baqylaý instrýmentterine emes, azamattardyń erikti qatysýyna táýeldi. Al azamattardyń qatysýy olardyń memleketke, memlekettik organdarǵa degen senimine negizdeledi», - dep atap ótti sarapshy.
Onyń aitýynsha, eldegi sarapshylar men áleýmettanýshylar, saiasattanýshylar qoǵamdaǵy senimniń jetkilikti deńgeide emestigin burynnan aityp kele jatyr.
«Búkilálemdik qundylyqtar sholýynyń málimetterine sensek, eldegi senim daralanǵan, iaǵni halyq jaqyn otbasylyq ainalasynan basqa eshkimge derlik senbeidi. Eger ádettegi jaǵdaida bul teoriia túrindegi qorytyndy siiaqty estilse, pandemiianyń jarty jylynda senimsizdiktiń «qoldanbaly» sipatyn bárimiz sezindik – úrei týǵyzý jáne joǵary deńgeidegi belgisizdik, infodemiia, memleket pen azamattardyń áreketteriniń kelisilmeýi baiqaldy. Ókinishke qarai, memlekettik sektorǵa senim deńgeii ortalyq memlekettik organdardyń strategiialyq josparlarynda, óńirlerdi damytý baǵdarlamalarynda joq. Al búkil álemde memleketke degen senim tómennen joǵaryǵa – jergilikti basqarýdan ortalyqqa qarai qalyptasady (Edelman Trust Barometer 2020, memlekettik basqarýdyń ártúrli deńgeiindegi senim deńgeiin salystyrý)», - deidi S. Sádieva.
Sondyqtan halyqtyń eń aldymen qala, eldimekender, aimaqtar ákimderine degen senimin arttyrý mindeti COVID-19-ǵa qarsy kúres strategiiasynyń bir bólshegine ainalýy qajet. Sebebi senim qoǵamnyń minez-qulyqtyq ustanymyna bailanysty kez kelgen memlekettik saiasat úshin óte mańyzdy.
«Ashyq memleket saiasaty bir-eki ortalyq memlekettik organnyń vedomstvolyq mindeti bolyp qalmaýy kerek. Senim kórsetkishteri memlekettik josparlaý, óńirlik saiasat júiesine enýi qajet, memlekettik sektordaǵy kadrlyq sheshimder úshin negizge ainalýy tiis. Biýdjettiń málimetterin, esepterin jáne ashyqtyǵyn jariialaý týraly alǵashqy keshendi saiasat 2015 jyly «100 naqty qadam» Ult josparyn júzege asyrý sheńberinde engizilgen bolatyn. Qazir olardy qaita baǵalaý, qatańdatý jáne jetildirý ýaqyty keldi. Búginde halyqtyń memlekettik júielerge, qyzmet kórsetý servisteri men provaiderlerine, sondai-aq jeke adamdarǵa degen senim deńgeiin anyqtaý boiynsha júieli zertteýler ótkizý qajet», - deidi Sabina Sadieva.
