Aqparat jáne qoǵamdyq damý ministriniń keńesshisi Lima Dias qazaqstandyqtardy Halyqtyq baqylaý tobyna qosylyp, meditsinalyq uiymdarǵa monitoring júrgizýge shaqyrdy, dep habarlaidy "Ult aqparat".
«Bul - árbirimizdiń azamattyq jaýapkershiligimiz! Biz pandemiiany osy jolmen jeńe alamyz. Qazirgi tańda osynaý úreili aýrý órship turǵan ýaqytta halyqtyń kúshi qalai oianyp kele jatqanyn, qoǵamdyq baqylaýdyń mańyzy zor ekenin kórip otyrmyz. Belsendi qazaqstandyqtar kún saiyn volonterler qataryna jazylyp, elge pandemiiany eńserýge kómektesýde. Árkim shama-sharqynsha atsalysýda», - dep jazady Lima Dias Facebook-paraqshasynda.
Onyń jazýynsha, belsendiler meditsinalyq uiymdardyń ishinde qoǵamdyq baqylaý júrgizip jatyr. Osy bastama Densaýlyq saqtaý ministri Aleksei Tsoidyń da nazaryn aýdartqan.
«Memlekettiń osyndai bastamany qoldap jatqany qýantady. Men de daiynmyn. Taiaýdan beri Aqparat jáne qoǵamdyq damý ministri Aida Balaevanyń keńesshisimin. Aqparat jáne qoǵamdyq damý ministrligi tarapynan aýrýhanalarǵa qoǵamdyq baqylaý júrgizý jumysyn úilestirý maǵan júkteldi», - deidi ol.
Bul rette, Halyqtyq baqylaý meditsinalyq personaldyń jumysyna kedergi keltirmeýdi basty nazarǵa alyp otyr.
«Sol sebepti dárigerlerge eń birinshi kezekte kómektesý úshin qoǵamdyq baqylaý kerek. Qazirgi ýaqytta mańyzdysy: monitoring pen baqylaýdyń tiimdi mehanizmderin daiarlap, qysqa ýaqytta belsendilerdi úilestirý kerek, BAQ pen memlekettik organ bolyp, bir-birimizben yqpaldasa jumys júrgizgenimiz durys. Ideialaryńyz nemese usynystaryńyz bolsa, qoǵamdyq baqylaý tobyna qosylǵyńyz kelse pikirge usynysyńyzdy qaldyryńyz. Bolmasa diaslimakz@gmail.com poshtasyna hat joldaýǵa bolady. Bailanystamyn», - deidi ol.
