Koronavirýs indetimen kúresip jatqan dárigerlerge úsh sanat boiynsha jalaqysyna ústemeaqy qosylady. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy "Ult aqparat"
«Memleket basshysy Qasym-Jomart Toqaev koronavirýspen kúresip jatqan meditsina qyzmetkerlerine kómek kórsetý týraly tapsyrma bergen. Osyǵan orai búgin Úkimet basshysy Asqar Mamin memlekettik komissiianyń otyrysyn ótkizip, onda arnaiy sheshim qabyldady», - dedi ministr.
Onyń atap ótýinshe, atalǵan sheshimge sáikes meditsina qyzmetkerleri jumysynyń qaýiptiligine qarai 3-topqa bólingen.
«Birinshi top - bul reanimatsiia bólimderimen qosa alǵanda juqpaly aýrýlar stantsionarlarynyń dárigerleri, orta jáne kishi meditsina qyzmetkerleri. Barlyǵy - 3 284 maman. Olardyń jalaqysyna ústemeaqy aiyna 850 myń teńgeni quraidy. Iaǵni, ortasha ailyǵyn qosqanda olar aiyna shamamen 1 mln teńgeniń ústinde alady. Ekinshi top - provizorlyq statsionar men jedel járdem qyzmetteriniń dárigerleri, orta jáne kishi meditsina qyzmetkerleri. Barlyǵy - 11 951 maman. Olardyń ústemaqysy aiyna 425 myń teńgeni quraidy. Iaǵni, ortasha ailyǵyn qosqanda olar aiyna shamamen 600 myń teńge alady»,- dedi Dáýren Abaev.
Ministrdiń aitýynsha, úshinshi topqa karantindik statsionar dárigerleri, orta jáne kishi meditsina qyzmetkerleri, sanitarlyq dárigerler,jedel járdem júrgizýshileri jáne taǵy basqalary kiredi.
«Barlyǵy - 10 994 qyzmetker. Olar aiyna 212 myń teńge ústemeaqy alady. Iaǵni, ortasha ailyǵyn qosqanda olar shamamen 380 myń teńge alady», - dedi ol.
