Almatydaǵy №36 qalalyq emhananyń pýlmonolog-dárigeri, meditsina ǵylymynyń kandidaty Dáme Sailanova SOVID-19 infektsiiasymen aýyrǵandardyń densaýlyǵy týraly aityp berdi, dep habarlaidy QazAqparat.
Mamannyń aitýynsha, Covid-19 aýrýymen aýyrǵan patsientterdiń densaýlyǵynyń jaǵdaiy ártúrli, aýrýshańdyqty kótere alýyna bailanysty.
«Aýrýdan aiyqqan adamnyń densaýlyǵy bir aidan bir jylǵa deiingi aralyqta qalpyna keledi. Ókpesi zaqymdanǵan patsientterde pnevmofibrioz týyndaýy múmkin, iaǵni rentgenge túsken kezde ol tigis sekildi kórinedi. Koronavirýspen aýyrǵan patsientterdiń keibireýinde jalpy álsizdik, tez sharshap qalý, ashýlanshaqtyq, kóńil kúiiniń jii ózgerýi, uiqysynyń buzýylýy, depressiia mazasyn alady, mundai kezde emdeý sharasyn júrgizip organizmdi bekitý qajet. Aýyr ótken kovid pnevmoniiasynan keiingi patsientterdi biz, kórsetkishteri boiynsha, ókpeniń jeldetýin jaqsartý, mazasyzdyq pen depressiianyń aldyn alý, ómir súrýin jaqsartý maqsatynda ońaltý ortalyqtaryna jiberemiz», - deidi dáriger.
Ońaltýdyń uzaqtylyǵy 14 kúnge deiin sozylady. Ol jerde reabilitolog dárigerlerdiń baqylaýynda bolady. Depressiia belgisi anyqtalǵan patsienttermen psihologtar jumys isteidi. Sondai-aq, fizioterapevtik emsharalar júrgizilip, keýde kletkasyna massaj jasalady.
Ókpesi 50-60% zaqymdanǵan patsientterdiń ókpe kletkasy jarty jylda qalpyna keledi.
«Aýyr ótken kovid pnevmoniiasynan keiingi qalpyna kelý úrdisi – ońai ári tez ótetin úrdis emes. Ár adamda qalpyna kelý ýaqyty ártúrli bolady, ol adam aǵzasyna jáne sozylmaly aýrýǵa bailanysty»,-deidi ol.
Maman koronavirýs infektsiiasymen aýyrǵan adamdarǵa belsendi qozǵalýǵa, tynys alý gimnastikasyn jasaýǵa, taza aýada jii serýendeýge, aqýyzy bar tamaqtardy kóp jeýge keńes berdi.
