Mańǵystaý oblysynda koronavirýs juqtyrǵan turǵyny kóp aýyldyń ákimi qyzmetinen bosatyldy, - dep habarlaidy «Habar 24».
Qaraqiia aýdanyna qarasty Senek aýylynda on kúnniń ishinde 23 jaǵdai anyqtalyp otyr. Indet aldymen kóp adamdy jiyp, as bergen úiden shyqqan. Keiinnen sol jiynda bolǵan biraz adamǵa juqqany belgili boldy.
Aiadai aýylda karantin erejesin saqtaýdy qamtamasyz etpegeni úshin oblys basshysynyń sheshimimen aýyl ákimi jumystan shettetildi. Al aýdan ákimine sógis jariialandy.
Qazir aýylǵa kire beris tusqa blokpostar qoiylyp, kúzet kúsheitildi.
Virýs kóp taraǵan aýdandar arasynda Beineý men Qaraqiia kósh bastap tur. Beineý aýdanynda 37 turǵynnan KVI anyqtaldy. Arasynda qoǵamdyq jumys ókilderi men dárigerler de bar.
Qazir bul qos aýdanda karantin rejimi kúsheitilgen. Otbasylyq jiyn jasaýǵa qatań tyiym salynǵan.
Jalpy, 3 naýryzdan bastap aimaqta 11 186 adam koronavirýsqa tekserilip, indet 129 adamnan anyqtaldy.
Aita keteiik, Mańǵystaý oblysynda karantin mamyrdyń 25-ne deiin uzartyldy.
