Koronavirýspen kúreske bólingen kólemdi qarajat flesh-mobqa jumsalǵan. Bul týraly Respýblikalyq arnaiy monitoring tobynyń jetekshisi Aigúl Soloveva búgin onlain-brifingide aitty, dep habarlaidy QazAqparat.
«Keshe Prezident koronavirýs infektsiiasymen kúresýge 191 milliard teńge bólingeni týraly aitty. Oǵan deiin shamamen 400 million dollar bólingen bolatyn. Bizdiń saraptamalyq top bul qarjy qandai sharaǵa bólingenin anyqtap jatyr. Mendegi aqparat boiynsha, 600 million teńge flesh-mob uiymdastyrǵan jarnamalyq kompaniiaǵa bólingen. Dál qazirgi jaǵdaiǵa jetkizbes úshin bul qarjyǵa qajetti dári-dármek, meditsinalyq quraldardy alýǵa bolar edi. Degenmen. osy 600 million teńgeniń 200 million teńgesi áli jumsalmaǵan eken. Biraq ol qarjy QR Densaýlyq ministrligi uiymdastyrǵan tenderge qatysyp, utyp alǵan kompaniiaǵa aýdarylyp qoidy», - deidi ol.
Onyń aitýynsha, qandai dári joq, qai dáriniń baǵasy qanshaǵa qymbattaǵany týraly habarlamalar azamattardan túsip jatyr.
«Prezidenttiń úndeýinen onyń oryn alyp jatqan quqyq buzýshylyq jaǵdailar týraly habardar bolyp otyrǵanyn bildik. Memleket basshysy quqyq qorǵaý organdaryna dári-dármektiń jasandy tapshylyǵyn jasap otyrǵandarmen jumys isteýge tapsyrma berdi. Respýblikalyq arnaiy monitoring toby Prezident bul tapsyrmany bergenge deiin eki kún buryn jumysty bastap ketti. Oryn alyp jatqan jaǵdailarǵa narazy bolý – bir bólek, al máseleni sheshýge úles qosý – bir bólek. Almaty, Nur-Sultan qalalarynda, Mańǵystaý, Shyǵys Qazaqstan oblystarynda monitoring júrgizip, dári-dármek baǵasyn 1,5-2 ese qymbattatqan faktilerdi anyqtadyq», - dedi Aigúl Soloveva.
