Keshe halyqaralyq mýzei kúnine orai UNESCO men Halyqaralyq mýzeiler keńesi (IKOM) taldaý júrgizip, murajailardyń koronavirýs pandemiiasynan qatty zardap shekkenin rastady, dep jazady Unesco.org.
Búgingi tańda murajailardyń 90 paiyzy nemese 85 myńnan astam mýzei jabylǵan. Onyń ústine Afrika men araldaǵy damýshy elderde mýzeilerdiń 5 paiyzy ǵana óz aýditoriiasyna onlain kontent usyna alǵan. Búkil álemdegi mýzeilerdiń 13 paiyzy esigin qaita ashpaýy múmkin.
Murajai qyzmetkerleri qatysqan eki zertteý de koronavirýs pandemiiasynyń mýzei isine áserin baǵalaýdy maqsat etti. Olar bul salanyń álemdik qaýip-qaterge qalai beiimdelgenin jáne ol aiaqtalǵannan keiin mýzeidi qoldaý ádisteri qandai bolatynyn anyqtaýǵa tyrysty.
«Murajailar qoǵam ornyqtylyǵyn qamtamasyz etýde jetekshi ról atqarady, - deidi UNESCO bas direktory Odre Azýle. - Biz olardyń bul daǵdaryspen kúreste jeńip shyǵýyna jáne aýditoriiamen bailanysyn úzbeýine kómektesýimiz kerek. Bul pandemiia adamzattyń jartysyna tsifrlyq tehnologiialar qoljetimdi emestigin esimizge saldy. Biz eń álsiz jáne oqshaýda otyrǵan jandardyń mádenietten qol úzbeýi úshin jumys isteýimiz kerek».
UNESCO mamyr aiynyń ortasynda ResiliArt qozǵalysy aiasynda mýzeilerge arnalǵan pikirtalasty bastaǵan edi. Alǵashqy úsh diskýssiia iber-amerikalyq óńirdegi jaǵdaidy jáne mýzei men osy istiń mamandaryn qoldaý strategiiasyn sóz etedi.
IKOM júrgizgen zertteý kórermeninen aiyrylǵan mýzeilerdiń tabysy azaiatynyn kórsetip berdi. Bul sondai-aq mýzeimen bailanysty mamandyqtarǵa da áser etýi múmkin.
UNESCO men IKOM taiaýda atalmysh zertteýdiń nátijesin jariialaidy.
