Qazaqstanda ótken táýlikte (17 jeltoqsan) 690 adamda koronavirýs infektsiiasy PTR arqyly rastalsa, soǵan uqsas pnevmoniiamen tek 24 adam tirkeldi. Bul týraly infektsiiany taratpaý jónindegi vedomstvoaralyq komissiianyń resmi saity jazdy. Kórsetkishterdiń azaiýy indettiń báseńdegenin bildire me, álde mereke kúnderine bailanysty test tapsyrǵandar az boldy ma, ol jaǵy beimálim.
Ótken táýlikte koronavirýstan 7 kisi, pnevmoniiadan 2 kisi kóz jumdy.
Covid rastalǵan adamdardyń tirkelýi boiynsha soltústik jáne shyǵys aimaqtar áli de alda tur. Ótken táýlikte Pavlodar oblysynda koronavirýspen 98 adam, Qostanai oblysynda – 68, Shyǵys Qazaqstan oblysynda – 65, Soltústik Qazaqstan oblysynda – 64, Aqmola oblysynda – 57 adam tirkeýge alyndy. Almaty (66 adam) jáne Nur-Sultan (54 adam) qalalary da aldyńǵy qatarda tur. Atyraý (60), Almaty (43), Batys Qazaqstan (36), Qaraǵandy (31), Jambyl (25) oblystarynda aýyrǵandar kóbeigeni baiqalady. Ońtústik aimaqtarda bul infektsiiamen tirkelgender az.
Jalpy el boiynsha koronavirýs juqtyrǵandar - 145 213 adam, al 1 tamyzdan bastap soǵan uqsas pnevmoniiaǵa shaldyqqandar - 44 338 adam. Resmi esep boiynsha, jalpy 2 641 kisi kóz jumdy.
Aýyrǵandardyń basym kópshiligi jazylyp shyqqan. Ótken táýlikte 561 adam bul dertten aiyqty. Qazir koronavirýs pen belgileri soǵan uqsas pnevmoniiadan 25 myńdai kisi emdelip jatyr.
Olardyń ishinde 4 389 patsient - statsionarda, 20 960 naýqas ambýlatoriialyq deńgeide em qabyldaýda.
Qazaqstan densaýlyq saqtaý ministrliginiń habarlaýynsha, aýyryp jatqandardyń 242-siniń hali aýyr, 35-iniń jaǵdaiy óte aýyr. 40 naýqas ókpeni jasandy jeldetý apparatyna qosylǵan.
