قازاقستاندا ٶتكەن تەۋلٸكتە (17 جەلتوقسان) 690 ادامدا كوروناۆيرۋس ينفەكتسيياسى پتر ارقىلى راستالسا, سوعان ۇقساس پنەۆمونييامەن تەك 24 ادام تٸركەلدٸ. بۇل تۋرالى ينفەكتسييانى تاراتپاۋ جٶنٸندەگٸ ۆەدومستۆوارالىق كوميسسييانىڭ رەسمي سايتى جازدى. كٶرسەتكٸشتەردٸڭ ازايۋى ٸندەتتٸڭ بەسەڭدەگەنٸن بٸلدٸرە مە, ەلدە مەرەكە كٷندەرٸنە بايلانىستى تەست تاپسىرعاندار از بولدى ما, ول جاعى بەيمەلٸم.
ٶتكەن تەۋلٸكتە كوروناۆيرۋستان 7 كٸسٸ, پنەۆمونييادان 2 كٸسٸ كٶز جۇمدى.
Covid راستالعان ادامداردىڭ تٸركەلۋٸ بويىنشا سولتٷستٸك جەنە شىعىس ايماقتار ەلٸ دە الدا تۇر. ٶتكەن تەۋلٸكتە پاۆلودار وبلىسىندا كوروناۆيرۋسپەن 98 ادام, قوستاناي وبلىسىندا – 68, شىعىس قازاقستان وبلىسىندا – 65, سولتٷستٸك قازاقستان وبلىسىندا – 64, اقمولا وبلىسىندا – 57 ادام تٸركەۋگە الىندى. الماتى (66 ادام) جەنە نۇر-سۇلتان (54 ادام) قالالارى دا الدىڭعى قاتاردا تۇر. اتىراۋ (60), الماتى (43), باتىس قازاقستان (36), قاراعاندى (31), جامبىل (25) وبلىستارىندا اۋىرعاندار كٶبەيگەنٸ بايقالادى. وڭتٷستٸك ايماقتاردا بۇل ينفەكتسييامەن تٸركەلگەندەر از.
جالپى ەل بويىنشا كوروناۆيرۋس جۇقتىرعاندار - 145 213 ادام, ال 1 تامىزدان باستاپ سوعان ۇقساس پنەۆمونيياعا شالدىققاندار - 44 338 ادام. رەسمي ەسەپ بويىنشا, جالپى 2 641 كٸسٸ كٶز جۇمدى.
اۋىرعانداردىڭ باسىم كٶپشٸلٸگٸ جازىلىپ شىققان. ٶتكەن تەۋلٸكتە 561 ادام بۇل دەرتتەن ايىقتى. قازٸر كوروناۆيرۋس پەن بەلگٸلەرٸ سوعان ۇقساس پنەۆمونييادان 25 مىڭداي كٸسٸ ەمدەلٸپ جاتىر.
ولاردىڭ ٸشٸندە 4 389 پاتسيەنت - ستاتسيوناردا, 20 960 ناۋقاس امبۋلاتورييالىق دەڭگەيدە ەم قابىلداۋدا.
قازاقستان دەنساۋلىق ساقتاۋ مينيسترلٸگٸنٸڭ حابارلاۋىنشا, اۋىرىپ جاتقانداردىڭ 242-سٸنٸڭ حالٸ اۋىر, 35-ٸنٸڭ جاعدايى ٶتە اۋىر. 40 ناۋقاس ٶكپەنٸ جاساندى جەلدەتۋ اپپاراتىنا قوسىلعان.
