Júrektiń sozylmaly jetkiliksizdigi, júrektiń koronarlyq aýrýy bar naýqastarda koronavirýs pnevmoniiasy basqalarmen salystyrǵanda qiynyraq ótedi.
Bul pikirdi «Ulttyq ǵylymi kardiohirýrgiia ortalyǵy» AQ tóraǵasynyń mindetin atqarýshy Mahabbat Bekbosynova aityp berdi, dep habarlaidy QazAqparat.
Mahabbat Bekbosynovanyń aitýynsha, koronavirýs pnevmoniiasynyń damý qaýpindegi eń aýyr faktor – arteriialyq gipertoniia. KVI men koronavirýs pnevmoniiasynan qaitys bolǵandardyń 50 paiyzynda arteriialyq gipertoniia bolǵan.
«Arteriialyq gipertoniiasy bar naýqastar ókpeniń óte tez jáne aýyr qabynýy damityn birinshi qaýip tobynda tur. Júrek-qantamyr patologiiasy, arteriialyq gipertoniiasy, júrek jetkiliksizdigi bar barlyq qazaqstandyqtardan qazirden bastap qaýip tobyn anyqtap, olardyń jaǵdaiyn egjei-tegjeili baqylaý úshin turǵylyqty jeri boiynsha emhanalarǵa mindetti túrde esepke turýyn suraimyn», - dedi Mahabbat Bekbosynova.
Dárigerdiń málimetinshe, júrek-qantamyr patologiiasy bar naýqastarda aýrýdyń alǵashqy belgileri anyqtalsa, dárigerge jedel júginý óte mańyzdy. Ózdiginen emdelýge, derbes áreket etýge múldem bolmaidy.
«Mundai naýqastarda ókpeniń qabynýy óte tez damidy jáne ókinishke qarai pnevmoniia óte aýyr formada ótedi. Jedel járdem kelgenshe naýqastyń qan qysymyn ólsheý kerek. Meniń oiymsha, joǵary qan qysymynan zardap shegetin adamdardyń kópshiliginiń úiinde qysymdy tonometrmen ólsheitin múmkindik bar. Eger qysym joǵarylasa, naýqasty jatqyzý kerek jáne dári qobdishasynda «Kaptopril» bolsa, sony berý kerek», - deidi Mahabbat Bekbosynova.
Aita keterligi, búginde koronavirýs infektsiiasyn bastan keshirgen keibir patsientterde sozylmaly sharshaý sindromy baiqalǵan. M. Bekbosynova naýqastyń jai-kúiin barynsha jan-jaqty baǵalaýǵa múmkindik beretin Chadera shkalasy bar ekendigin aitady.
«Naýqas ózin ne mazalaitynyn túsindire almaǵan, biraq qalypty ómirge orala almai júrgenin túsingen kezde sozylmaly sharshaýǵa ushyraǵan deýge bolady. Mine osy kezde atalǵan shkala sol patsienttiń jai-kúiin shynaiy baǵalaýǵa múmkindik beredi. Shkalada 11 ball bar. Patsienttiń jai-kúii 3 ballaǵa deiin bolsa, onda qalypty sanalady. Al 4-ten 11 ballǵa deiingi aralyq patsientte qandaida bir problemanyń bar ekendigin bildirdi jáne oǵan nevrologqa nemese psihoterapevtke qaralýy qajet. Shyndyǵyna kelgende bizde koronavirýsty bastan keshirgen patsentterdi tekserý hattama bar. Ol zerthanalyq, sonymen qatar instrýmentaldy zertteý ádisterin qamtidy. Patsient qanynan jalpy saraptama alamyz. Óitkeni, qan immýndyq júieniń qandai jaǵdaida ekenin jaqsy kórsetip beredi. Leikopeniia men limfotsitopeniia baqylaýynda áli kúnge deiin turǵan patsientter bar. Koronavirýsty bastan keshirgenderine 2-3 ai ótse de bul patsienterdiń immýndyq júiesinde problema bar degen sóz», - dedi Mahabbat Bekbosynova.
