Almaty men Nur-Sultan virýstyń taraýy boiynsha "qyzyl aimaqqa" endi. "Sary aimaqta" - Aqmola, Batys Qazaqstan, Atyraý, Pavlodar oblystary tur. Qalǵan oblystar men qalalar "jasyl aimaqta".
Almaty qalasynyń sanitarlyq-epidemiologiialyq baqylaý departamentiniń dereginshe, qalada R koeffitsienti (bir naýqastyń qansha adamǵa virýs juqtyratynyn kórsetetin kórsetkish) 1-den asqan, sońǵy 7 kún ishinde 100 myń turǵynǵa 47,5 naýqastan kelgen. Virýstyń 23 paiyzy - oiyn-saýyq ortalyqtary, saýda úilerinen, 22 paiyzy qoǵamdyq oryndardan tabylǵan.
Sársenbi kúni Nur-Sultan qalasynyń bas sanitar dárigeriniń qaýlysy jariialanyp, qaladaǵy karantinge birqatar ózgerister engizildi. Sońǵy ózgeris boiynsha, jalpy bilim berý mektepterinde kezekshi synyptarda balalar sanyn 15-ten 25-ke deiin arttyrýǵa ruqsat etilgen. Mektepke deiingi bilim berý mekemeleri de bir topta 25 balany oqyta alady. Biraq jańadan kezekshi synyp ashýǵa tyiym salynǵan. SPA-ortalyqtar, salondar, massaj ortalyqtary bir mezgilde úshten astam adam qabyldai almaidy, biraq jumys ýaqytynda shekteý joq.
Almaty qalasy koronavirýs juqtyrǵandardyń táýliktik kórsetkishi boiynsha kópten beri respýblika boiynsha alda keledi. 9 naýryzda Almatyda - 160, Nur-Sultan qalasynda 143 naýqas anyqtalǵan. Olardyń PTR testi oń shyqqan. Seisenbi kúni qalǵan oblystar men qalalarda tirkelgen naýqastar 100-den aspaǵan. 8 naýryz kúngi aqparat boiynsha (densaýlyq saqtaý ministrligi 2 kún burynǵy adam ólimi men koronavirýs pnevmoniiasy deregin jariialap júr) 4 adamǵa koronavirýs pnevmoniiasy qoiylǵan. 3 adam ólimi tirkelgen: 2 adam - koronavirýstan, 1 adam koronavirýs pnevmoniiasynan qaitys bolǵan dep aitylady.
2020 jyldyń 13 naýryzynan beri elde 220 018 adamnyń PTR testi oń nátije kórsetken, basym bóligi jazylǵan. 2821 adam qaitys bolǵan.
1 tamyzdan beri 49 581 adamnan koronavirýs pnevmoniiasy anyqtalǵan, 647 adam qaitys bolǵan.
Qazir 18,4 myń adam koronavirýsten emdelip jatyr (4 myńnan astamyna koronavirýs pnevmoniiasy diagnozy qoiylǵan).
Qazaqstan koronavirýs pen koronavirýs pnevmoniiasyna shaldyqqandar men odan qaitys bolǵandardy bólek eseptep keledi. Biraq halyqaralyq uiymdar Qazaqstandaǵy koronavirýs ahýaly jaily málimet bergen kezde eki resmi málimetti biriktirip beredi.
