الماتى مەن نۇر-سۇلتان ۆيرۋستىڭ تاراۋى بويىنشا "قىزىل ايماققا" ەندٸ. "سارى ايماقتا" - اقمولا, باتىس قازاقستان, اتىراۋ, پاۆلودار وبلىستارى تۇر. قالعان وبلىستار مەن قالالار "جاسىل ايماقتا".
الماتى قالاسىنىڭ سانيتارلىق-ەپيدەميولوگييالىق باقىلاۋ دەپارتامەنتٸنٸڭ دەرەگٸنشە, قالادا R كوەففيتسيەنتٸ (بٸر ناۋقاستىڭ قانشا ادامعا ۆيرۋس جۇقتىراتىنىن كٶرسەتەتٸن كٶرسەتكٸش) 1-دەن اسقان, سوڭعى 7 كٷن ٸشٸندە 100 مىڭ تۇرعىنعا 47,5 ناۋقاستان كەلگەن. ۆيرۋستىڭ 23 پايىزى - ويىن-ساۋىق ورتالىقتارى, ساۋدا ٷيلەرٸنەن, 22 پايىزى قوعامدىق ورىنداردان تابىلعان.
سەرسەنبٸ كٷنٸ نۇر-سۇلتان قالاسىنىڭ باس سانيتار دەرٸگەرٸنٸڭ قاۋلىسى جارييالانىپ, قالاداعى كارانتينگە بٸرقاتار ٶزگەرٸستەر ەنگٸزٸلدٸ. سوڭعى ٶزگەرٸس بويىنشا, جالپى بٸلٸم بەرۋ مەكتەپتەرٸندە كەزەكشٸ سىنىپتاردا بالالار سانىن 15-تەن 25-كە دەيٸن ارتتىرۋعا رۇقسات ەتٸلگەن. مەكتەپكە دەيٸنگٸ بٸلٸم بەرۋ مەكەمەلەرٸ دە بٸر توپتا 25 بالانى وقىتا الادى. بٸراق جاڭادان كەزەكشٸ سىنىپ اشۋعا تىيىم سالىنعان. سپا-ورتالىقتار, سالوندار, ماسساج ورتالىقتارى بٸر مەزگٸلدە ٷشتەن استام ادام قابىلداي المايدى, بٸراق جۇمىس ۋاقىتىندا شەكتەۋ جوق.
الماتى قالاسى كوروناۆيرۋس جۇقتىرعانداردىڭ تەۋلٸكتٸك كٶرسەتكٸشٸ بويىنشا كٶپتەن بەرٸ رەسپۋبليكا بويىنشا الدا كەلەدٸ. 9 ناۋرىزدا الماتىدا - 160, نۇر-سۇلتان قالاسىندا 143 ناۋقاس انىقتالعان. ولاردىڭ پتر تەستٸ وڭ شىققان. سەيسەنبٸ كٷنٸ قالعان وبلىستار مەن قالالاردا تٸركەلگەن ناۋقاستار 100-دەن اسپاعان. 8 ناۋرىز كٷنگٸ اقپارات بويىنشا (دەنساۋلىق ساقتاۋ مينيسترلٸگٸ 2 كٷن بۇرىنعى ادام ٶلٸمٸ مەن كوروناۆيرۋس پنەۆمونيياسى دەرەگٸن جارييالاپ جٷر) 4 ادامعا كوروناۆيرۋس پنەۆمونيياسى قويىلعان. 3 ادام ٶلٸمٸ تٸركەلگەن: 2 ادام - كوروناۆيرۋستان, 1 ادام كوروناۆيرۋس پنەۆمونيياسىنان قايتىس بولعان دەپ ايتىلادى.
2020 جىلدىڭ 13 ناۋرىزىنان بەرٸ ەلدە 220 018 ادامنىڭ پتر تەستٸ وڭ نەتيجە كٶرسەتكەن, باسىم بٶلٸگٸ جازىلعان. 2821 ادام قايتىس بولعان.
1 تامىزدان بەرٸ 49 581 ادامنان كوروناۆيرۋس پنەۆمونيياسى انىقتالعان, 647 ادام قايتىس بولعان.
قازٸر 18,4 مىڭ ادام كوروناۆيرۋستەن ەمدەلٸپ جاتىر (4 مىڭنان استامىنا كوروناۆيرۋس پنەۆمونيياسى دياگنوزى قويىلعان).
قازاقستان كوروناۆيرۋس پەن كوروناۆيرۋس پنەۆمونيياسىنا شالدىققاندار مەن ودان قايتىس بولعانداردى بٶلەك ەسەپتەپ كەلەدٸ. بٸراق حالىقارالىق ۇيىمدار قازاقستانداعى كوروناۆيرۋس احۋالى جايلى مەلٸمەت بەرگەن كەزدە ەكٸ رەسمي مەلٸمەتتٸ بٸرٸكتٸرٸپ بەرەدٸ.
