Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qisyqova koronavirýs infektsiiasy tabylǵan qazaqstandyq naýqastyń jai kúii týraly aityp berdi, dep habarlaidy QazAqparat.
Buǵan deiin QR Densaýlyq saqtaý ministri Eljan Birtanov koronavirýs juqtyrǵan úshinshi adamnyń elordada anyqtalǵanyn habarlaǵan edi.
«Qazaqstandyq áiel 12 naýryz kúni Milan-Máskeý-Nur-Sultan reisinen túsirildi. Sebebi Italiia koronavirýstyq infektsiia qaýpi boiynsha birinshi sanatqa engizilgen. Osyǵan bailanysty keshe tańǵy 8:25-te QR azamaty reisten túsirilip, bizdiń statsionarǵa jetkizildi. Qazir ol Nur-Sultan qalasyndaǵy kópbeiindi meditsinalyq ortalyqtyń karantindik statsionarynda jatyr», - dedi S. Qisyqova Ortalyq kommýnikatsiialar qyzmetinde ótken baspasóz máslihatynda.
Koronavirýstyq infektsiiany diagnostikalaý men emdeý hattamasyna sáikes, áielden biomaterial alynyp, Ulttyq saraptama ortalyǵynyń virýsologiialyq zerthanasyna jiberilgen.
«Búgin zerthana nátijesin aldyq jáne qazaqstandyq áielden koronavirýstyq infektsiia tabyldy. Qazirgi ýaqytta naýqas densaýlyǵyna esh shaǵym túspedi, biraq infektsiia tabylǵandyqtan, emdeý sharalary bastaldy. Ol jeldetkishi bar bir adamdyq palatada jatyr», - dedi basqarma basshysy.
Sondai-aq, qazaqstandyq áielmen bir ushaqta 90 jolaýshy bolǵan. Nur-Sultan qalasynyń Densaýlyq saqtaý basqarmasy olarǵa habarlasyp jatyr.
