Kóliktegi memlekettik bas sanitarlyq dáriger Sádýaqas Baiǵabylov 2 sanattaǵy elderden Qazaqstanǵa halyqaralyq áýe reisterimen keletin qazaqstandyqtar men sheteldikter úshin qazannyń birinshi onkúndiginde COVID-19 boiynsha jańa talaptardy engizýge qatysty túsinik berdi, dep habarlaidy "Ult aqparat".
«Qazirgi kezde kóliktegi sanitarlyq-epidemiologiialyq qyzmet mamandary áýe kompaniialary men áýejailardyń ókilderimen birlese ekinshi sanattaǵy (21 memleket) elderden qazan aiynan bastap áýe reisterimen Qazaqstanǵa keletin adamdar úshin qosymsha talaptardy engizý jaǵdaiyndaǵy jumysty uiymdastyrý máselesin pysyqtap jatyr», - dedi Sádýaqas Baiǵabylov.
Áýe kompaniialary Qazaqstanǵa bilet satyp alatyn jolaýshylardy COVID-19-ǵa qatysty qosymsha talaptar týraly habardar etedi.
Osy oraida shetel azamattarynda memlekettik shekaradan ótý kezinde úsh kúnnen aspaityn merzimdegi COVID-19-ǵa teris nátije týraly anyqtama bolýy kerek. Bul talap eskerilmese, olar saparlaityn áýejaidan ushaq bortyna qabyldanbaidy.
Al Qazaqstan azamattarynda anyqtama bolmasa, onda olar kelgen boida borttan PTR analiz tapsyrý úshin eki kúndik karantinge statsionarǵa ornalastyrylady.
Óńirlerde osy maqsattarǵa arnalǵan tiisti statsionarlar daiyndaldy.
Atalǵan jańashyldyqtardy engizý datasy jaiynda qasymsha aqparat taratylatyn bolady.
