QR Densaýlyq saqtaý ministriniń birinshi orynbasary Marat Shoranov Aziia damý bankiniń basshylyǵymen vaktsinoprofilaktika boiynsha seriktestik ornatý máselesin talqylady, dep habarlaidy "Ult aqparat".
Ministrlikten málim etkendei, M.Shoranov Qazaqstandaǵy Aziia damý bankiniń turaqty ókildiginiń direktory Nariman Mannapbekovpen jáne Ortalyq jáne Batys Aziia elderi boiynsha Aziia damý bankiniń ókilderimen kezdesti.
M.Shoranov Qazaqstanda COVID-19 taralýynyń aldyn alý boiynsha júrgizilip jatqan jumystar, sonyń ishinde vaktsinoprofilaktika máseleleri týraly habardar etti. Sondai-aq ol ADB-ǵa densaýlyq saqtaý jobalary boiynsha tiimdi uzaq merzimdi yntymaqtastyq úshin alǵys bildirdi. ADB osy yntymaqtastyq aiasynda jáne koronavirýspen kúres maqsatynda az qamtylǵan otbasylardy quramynda dári-dármek pen qorǵaýdyń bastapqy meditsinalyq quraldary bar qobdishalarmen qamtamasyz etýge granttyq kómek kórsetken.
«1 aqpannan Qazaqstan Respýblikasynda halyqty jappai koronavirýs infektsiiasyna qarsy vaktsinatsiia bastaldy. Birinshi kezekte ol infektsiialyq statsionarlardyń, jedel meditsinalyq járdemniń, sondai-aq basqa da meditsina qyzmetkerlerin qamtidy. Keiin vaktsina kóleminiń jetkiliktiligine qarai vaktsinalanatyn kontingentti odan ári keńeite otyryp, qatarǵa pedagog, kúsh qurylymdarynyń qyzmetkerleri qosylatyn bolady. Búginde halyqty koronavirýstan qorǵaý, iaǵni KVI boiynsha qalyptasqan jaǵdaidy jeńýge jáne karantinsiz ádettegi ómirge oralý úshin vaktsinatsiiamen qamtý óte mańyzdy», - dedi Shoranov.
Óz kezeginde N.Mannapbekov ADB-nyń Qazaqstandaǵy ókildiginiń qazirgi qyzmeti týraly bólisti. Kezdesý barysynda ADB qyzmetkerleri vaktsinaǵa qol jetkizýge járdemdesýdiń Aziia-Tynyq muhity tetigin (Asia Pacific Vaccine access Facility, APVAX) tanystyrdy.
APVAX damýshy múshe elderge COVID-19 vaktsinalaryn satyp alýǵa jáne jetkizýge qoldaý kórsetetin resýrstar paketi men mehanizmdi usynady jáne 2 komponentten turady: jedel áreket etý komponenti jáne investitsiialyq komponent.
Vaktsinamen aldyn alý máseleleri boiynsha sheteldik seriktesterdi yntymaqtastyqqa tartý boiynsha júrgizilip jatqan jumystyń mańyzdylyǵyn eskere otyryp taraptar Qazaqstan Respýblikasynyń atalǵan APVAX tetigine qatysý múmkindigin qarastyrýǵa kelisti.
