Koronavirýs infektsiiasynan qorǵaný boiynsha Qazaqstan azamattaryna birneshe elge barmaýǵa keńes berildi, dep habarlaidy QazAqparat.
Bul týraly QR Bas memlekettik sanitariialyq dárigeri Jandarbek Bekshin aityp berdi.
«Álemde koronavirýs boiynsha jaǵdai kúnde ózgerip tur. QHR-da jaǵdai turaqty bolsa, basqa elderde jaǵdai kúrdelenip barady. Mysaly, keiingi kezderi Iran Respýblikasynda jaǵdai kúrdelenip barady. Resmi túrde onda 42 oqiǵa tirkelip, onyń 12-si ólimmen aiaqtaldy. Ońtústik Koreiada 10 ólim-jitim oqiǵasy, Italiiada - 10, Gonkongta - 2 jaǵdai tirkeldi. Sondyqtan, rettep alǵan 3 sanattyń tizimi ózgertildi», - dedi J. Bekshin Ortalyq kommýnikatsiialar qyzmetinde ótken baspasóz máslihatynda.
Densaýlyq saqtaý ministrligi 1-sanattaǵy qaýipti elder tizimine taǵy birqatar memleketti engizgen.
«Buryn birinshi sanatta tek QHR bolsa, bul tizimge Ońtústik Koreia, Japoniia, Italiia, Iran, Qytaidyń arnaiy ákimshilik aimaqtary - Gonkong, Makao, Taivan aimaǵy engizilip jatyr. Bul sheshim álemdegi jaǵdaidyń kúrdelenýin kórsetip jatyr. Bul elderden kelgen azamattar 1 naýryzdan bastap, úide karantinge oqshaýlanady. Olar óz mekenjaiy boiynsha oqshaýlanady. Kúndelikti jergilikti dárigerler osy azamattardy qarap shyǵyp, naqty tapsyrma berip jatyr», - dedi J. Bekshin.
Qaýiptiligi jaǵynan ekinshi sanatta úsh memleket bar - Singapýr, Tailand, Malaiziia.
«Úshinshi sanatqa - Vetnam, Germaniia, Aýstraliia, AQSh, Arab ámirlikteri, Kanada engizildi. Bul elderden kelip jatqan azamattar erkin júredi, sharýalarymen ainalysa alady. Biraq, olardyń jaǵdaiyn meditsinalyq qyzmetkerler telefon arqyly kúnara bilip turady», - dedi bas sanitarlyq dáriger.
