Elimizde koronavirýs juqtyrǵan azamattardyń sany qaitadan ósip bara jatyr. Kúni keshe ǵana PTR-test arqyly 716 adamda koronavirýs indeti rastaldy. Demek ár adam saqtyqqa kóbirek mán berýi kerek. Al osy jaǵdaida onkologiialyq aýrýy bar azamattar neni eskerýi kerek? Bul suraqqa Nur-Sultan qalasy ákimdigi Kópsalaly meditsina ortalyǵynyń direktory Muhtar Tóleýtaev jaýap berdi, dep jazady QazAqparat.
«Buqaralyq aqparat quraldary arqyly koronavirýsqa qarsy álemde vaktsinanyń birneshe túri paida bolǵanyn estip jatyrmyz. Keibiriniń indetke qarsy pármeni 90-95 paiyzǵa deiin baratyny aitylady. Degenmen olardyń qai-qaisysy bolmasyn tolyq tekserýden ótken joq. Ázirge zertteý, tekserý satysynda. Sondyqtan búgingi kúni kez kelgen vaktsinany onkologiialyq aýrýy bar adamǵa jasatqan qolaisyz dep oilaimyn. Óitkeni, ol immýnitetti qozǵap jiberýi múmkin. Onkologiialyq syrqattarǵa vaktsina salynǵany týraly ázirge málimet joq. Vaktsina ázirge resmi túrde qabyldanbaǵanyn umytpaiyq», - deidi Muhtar Tóleýtaev.
Koronavirýstan qorǵaný úshin onkologiialyq aýrýlary bar azamattar neni eskerýi kerek? Bul suraqqa jaýap bergen onkolog-maman qarapaiym qaýipsizdik erejeleriniń saqtalýy kerektigin eske saldy.
«Buǵan deiin dárigerler aityp kele jatqan qaýipsizdik sharalaryn qatań saqtaǵan durys. Onkologiialyq aýrýy bara azamattar, kóp adam jinalatyn orynǵa meilinshe, barmaýy kerek. Maska taǵyp, qarapaiym erejelerdi saqtanǵany durys. Onkologiiaǵa shaldyqqan adamdardyń arasynda koronavirýsty juqtyrǵandary kóp emes. Ol kisiler saqtyq sharalaryn ustanyp keledi dep esepteimiz», - dep sózin jalǵastyrdy onkolog-maman.
Elordadaǵy indet ýshyqqan maýsym-shilde aiynda Kópsalaly meditsina ortalyǵynyń mamandary esepte turǵan naýqastarǵa dári-dármegin úiine jetkizip beripti. Iaǵni naýqastar ortalyqqa kelmei, telefon arqyly habarlasyp, dárigerden keńes alǵan. Al jergilikti emhananyń onkologtary ýchaskelik nemese otbasylyq dárigerler arqyly syrqattarmen qarym-qatynasta bolǵan. Sebebi olar úshin halyq kóp jinalatyn oryndarǵa barý qaýipti. Patsientter Kópsalaly meditsina ortalyqqa nemese emhanaǵa kelýi mindetti bolǵan kezde ǵana (máselen diagnostikaǵa) baryp júrgen.
«Onkologiialyq aýrýlary bar adamdar bizdiń ortalyqqa em-dom alý úshin kelmes buryn jalpyǵa ortaq klinikalyq tekserýden jáne koronavirýs infektsiiasy boiynsha PTR-testten ótedi. Tekserýdiń bul túrinen olar jergilikti emhanadan ótýi tiis. Qaladaǵy emhanalardyń Kópsalaly meditsina ortalyqpen kelisimi bar. Emhanalar analiz qorytyndylaryn jiyp, bizdiń zerthanaǵa joldaidy. PTR-test qorytyndysy boiynsha koronavirýs juqtyrǵany belgili bolsa, patsient infektsiialyq statsionarǵa jetkiziledi. Ol jerde aldymen koronavirýstan emdelip alýy tiis. Iaǵni koronavirýstan emdelip jatqan naýqastyń onkologiialyq em-domy shegerilýi múmkin. Al ondai simptomdary bolmasa, ol kisiler emin ary qarai jalǵastyrady. Meniń oiymsha, búginge deiin koronavirýstyń onkologiialyq aýrýlardy týyndatýǵa sebep bolǵan jaǵdai kezdesken emes. Óitkeni onkologiialyq aýrý aiaq astynan paida bolmaidy. Mysaly, sozylmaly aýrýy bar adam ýaqtyly emdelmese, onyń aýrýy keleshekte onkologiiaǵa ainalýy yqtimal. Bul rette 100 paiyz onkologiiamen aýyryp ketpeidi. Biraq onkologiialyq aýrýlardy mundai jaǵdaida aǵzada paida bolý yqtimaldyǵy joǵary. Sondyqtan koronavirýstyń onkologiiaǵa sebepshi bolǵany týraly málimet joq. Olai bolmaidy dep te oilaimyn. Sebebi bul virýstyq infektsiialar siiaqty ótetin syrqat», - dep túidi Muhtar Tóleýtaev.
