Ótken táýlikte Qazaqstanda koronavirýs infektsiiasy PTR-testimen rastalǵan 2 840 jańa naýqas tirkeldi. Aýrý juqtyrǵandardyń táýliktik kórsetkishi boiynsha Almaty men Nur-Sultan qalalary alda keledi: Beisenbide Almatyda — 689, al astanada 586 jańa naýqas tirkeýge alynǵan. Aimaqtar arasynda Qaraǵandy oblysy birinshi orynda tur, munda bir táýlikte Covid-pen 250 adam esepke alyndy.
Qazaqstan densaýlyq saqtaý ministrliginiń habarlaýynsha, 5 mamyrda elde "Covid-tektes pnevmoniiamen" 101 adam tirkelgen. Bul — PTR-testi teris nátije kórsetse de, klinikalyq belgileri boiynsha koronavirýs qataryna jatqyzylǵan naýqastar.
Mundai aýrýlardy ministrlik ótken jyldyń jazynan bastap bólek sanap keledi. Iaǵni, tamyzdan beri elde "kovidke uqsas pnevmoniiamen" 53 400 adam tirkelip, onyń 829-y kóz jumǵan.
Densaýlyq saqtaý ministrligi statistikada "kovidke uqsas pnevmoniia" men zerthanada rastalǵan Covid málimetterin qospai, bólek esepteidi. Onyń ústine táýlik ishinde tirkelgen naýqastardy araǵa táýlik salyp, bólek jariialaidy.
Beisenbide elde Covid-ten 25 adam, "pnevmoniiadan" — 6 adam qaitys boldy.
Resmi derek boiynsha, byltyrǵy naýryzdan beri Covid derti PTR-men rastalǵan 337 652 adam tirkelgen, 3 858 adam qaitys bolǵan.
7 mamyrdaǵy málimet boiynsha, 42 436 adam koronavirýs infektsiiasynan (41 965 KVI+ jáne 471 KVI-) emdelip jatyr.Olardyń ishinde 14 551 patsient statsionarda, 27 885 naýqas ambýlatoriialyq deńgeide em qabyldaýda.KVI+, KVI- shaldyqqandardyń arasynda:• 782 adamnyń jaǵdaiy aýyr,• 188 patsienttiń jaǵdaiy óte aýyr,• 115 naýqas jasandy tynys alý apparatynda apparatynda jatyr.
Densaýlyq saqtaý ministrliginiń habarlaýynsha, 7 mamyrdaǵy jaǵdai boiynsha, Qazaqstanda koronavirýs vaktsinasynyń alǵashqy dozasyn 1,63 million adam, ekinshi komponentin 523 myńdai adam alǵan. Elde qazir úsh túrli vaktsina salynyp jatyr. Olar – Reseide ázirlenip, Qazaqstanda óndirilip jatqan "Spýtnik V", Qazaqstannyń ózi ázirlegen QazVac jáne Qytaidyń Sinopharm kompaniiasy ázirlep, Birikken Arab Ámirlikterinde shyǵarylǵan Naýat Vax ekpesi.
Amerikadaǵy Djons Hopkins ýniversitetiniń sońǵy deregi boiynsha, álemde koronavirýs dertin juqtyrǵandar sany 156 millionǵa jetken, bul aýrýdan 3,2 million kisi kóz jumǵan.
