Memleket basshysy Densaýlyq saqtaý ministri Aleksei Tsoidy qabyldady, dep habarlaidy Aqordanyń baspasóz qyzmeti.
Qasym-Jomart Toqaevqa koronavirýs indetine qarsy kúres boiynsha Qazaqstanda qabyldanyp jatqan sharalar jóninde esep berildi.
Prezidentke pandemiianyń jer sharyndaǵy negizgi taralý tendentsiialary jáne virýsqa qarsy kúrestegi elimizdiń retingisi týraly da baiandaldy. Dúniejúzilik densaýlyq saqtaý uiymynyń deregine sáikes, 1 million adamǵa shaqqandaǵy indetke shaldyqqandardyń sany boiynsha Qazaqstan 221 memlekettiń ishinde 109-orynda, ótkizilgen test synamalarynyń sany boiynsha 67-orynda, ólim-jitim boiynsha 94-orynda, COVID-19 indetinen jazylyp shyqqandardyń sany boiynsha 48-orynda, derttiń aýyr tiiýi turǵysynan 50-orynda.
Sonymen qatar Memleket basshysyna óńirlerdegi epidemiialyq jaǵdai týraly, sonyń ishinde, karantin sharalarynyń kúsheitilýi jáne ulttyq densaýlyq saqtaý júiesiniń qolda bar resýrstary jaiynda málimet berildi. Densaýlyq saqtaý ministri juqpaly aýrýlar statsionarlaryndaǵy dertke shaldyqqan adamdar jatatyn oryndardyń 33 paiyzǵa, jan saqtaý bólimderinde bul kórsetkish 21 paiyzǵa tolǵanyn aitty.
Aleksei Tsoi COVID-19 virýsyn juqtyrǵandar sanynyń kóbeiýine qaramastan, elimizdegi ahýaldyń baqylaýda turǵanyn jáne meditsinalyq qyzmettiń azamattarǵa qajetti kómek kórsetýge daiyn ekenin atap ótti.
Ministr elimizde adamdardyń koronavirýstan qaitys bolý deńgeii byltyrǵy shilde aiymen salystyrǵanda 4 ese tómendegenin jetkizdi. Bul dertke shaldyqqandarǵa kómek kórsetý úshin qabyldanǵan sharalardyń, sonyń ishinde alǵashqy meditsinalyq-sanitarlyq járdem berý deńgeiiniń tiimdiligin kórsetedi. Beiindi vedomstvonyń málimeti boiynsha, barlyq óńirdegi salynǵan juqpaly aýrýlar aýrýhanalary halyqaralyq standartqa sai keledi jáne naýqastarǵa qajetti kómek kórsetýde.
Qasym-Jomart Toqaev Aleksei Tsoiǵa epidemiialyq ahýaldy qatań baqylaýda ustaýdy, halyqty ýaqytyly ári tolyq qulaqtandyrý jumystaryn sapaly uiymdastyra otyryp, jappai vaktsina egýge daiyndyqty tiisti dárejede qamtamasyz etýdi tapsyrdy.
