Beisenbi kúni koronavirýstan jazylyp shyqqan adamdardyń sany álem boiynsha 200 myńnan asty, bul indetten kóz jumǵandardyń tirkelgen sanynan tórt ese kóp. Johns Hopkins University málimeti boiynsha, epidemiia búkil álemde 48 300 adamnyń ómirin jalmady, 202 541 adam jazyldy. Aýrý juqtyrǵan adamdardyń jalpy sany 952 myńǵa jýyqtaǵan, dep habarlaidy "Ult aqparat" Anadolu Agency agenttigine silteme jasap.
Indetten aiyqqan adamdardyń eń kóp sany – virýs taraǵan oshaq Qytai elinde tirkeldi (76 571 adam). Ispaniiada 26 743 adam virýsty jeńdi. Germaniiada jazylyp shyqqandar sany - 19 175 adam.
Johns Hopkins University málimetinshe, beisenbi kúngi jaǵdai boiynsha, Qytaida koronavirýs juqtyrýdyń 82 400 oqiǵasy rastaldy, 3 322 adam kóz jumdy. Ispaniiada 10 myńnan astam adam qaitys bolǵany, 104 myń adam aýrý juqtyrǵany atap ótiledi.
I ndetten Italiiada eń kóp adam kóz jumǵan. Koronavirýs bul elde 13 200-ge jýyq adamnyń ómirin qiyp áketti, aýrýǵa shaldyqqandardyń jalpy sany 110 600 adamǵa jetken. Indetti 16800 adam jeńip shyqqan. Germaniiada koronavirýstan bir myńǵa jýyq adam kóz jumdy, 78 myń adam aýrýǵa shaldyqty.
Sársenbi kúngi málimetter boiynsha, Frantsiiada virýstan 4032 adam qaitys boldy. Virýsty 58 myńǵa jýyq adam jeńip shyqqan.
Álemde COVID-19 aýrýyn juqtyrýdyń eń kóp oqiǵasy AQSh-ta tirkelgen (217 myńǵa jýyq adam). Epidemiiadan 8 670-ten astam adam saýyqty, elde aýrýdan kóz jumǵandar sany - 5130 adam.
Kóptegen elder koronavirýs eń kóp taraǵan óńirlerge kirýge shekteý engizip, qatań oqshaýlaý sharalaryn engizdi, sebebi Dúniejúzilik densaýlyq saqtaý uiymy virýstyń órshýin pandemiia dep jariialap, Eýropany – indettiń jańa oshaǵy dep ataǵan.
