Ózbekstandaǵy farmatsevtikalyq kásiporynda QAZCOVID-IN qazaqstandyq vaktsinasyn shyǵarý múmkindigin qarastyrý usynyldy. Mundai usynysty Densaýlyq saqtaý ministri Aleksei Tsoi Tashkentte áriptesi Abdýhakim Hadjibaevpen kezdesýde jasady, dep habarlaidy "Ult aqparat".
Qazaqstan Premer-Ministriniń orynbasary Eraly Toǵjanov bastaǵan resmi delegatsiia Ózbekstan Respýblikasyna barǵanyn buǵan deiin jazǵan bolatynbyz.
Issapar barysynda taraptar farmatsevtika salasyndaǵy yntymaqtastyqty talqylady, birqatar kezdesý men kelissóz ótkizdi, sondai-aq Tashkent qalasyndaǵy meditsinalyq nysandardyń jumysymen tanysty.
Densaýlyq saqtaý ministri Aleksei Tsoi Ózbekstan Respýblikasynyń Densaýlyq saqtaý ministri Abdýhakim Hadjibaevpen kelissózder barysynda Ózbekstandaǵy farmatsevtikalyq kásiporynda otandyq QAZCOVID-IN vaktsinasyn shyǵarý múmkindigin qarastyrýdy usyndy.
«Biz epidemiiaǵa qarsy kúreste seriktestikti jandandyrýdy, jedel jaǵdaida ózara tiimdi is-qimyl jasaýdy, sondai-aq qazirgi epidemiologiialyq ahýal jáne ony turaqtandyrý boiynsha júrgizilip jatqan sharalarǵa qatysty aqparat almasýdy jolǵa qoiýdy usynamyz», - dedi A.Tsoi.
Sonymen qatar, Aleksei Tsoi densaýlyq saqtaýdyń perspektivaly salalarynda, onyń ishinde tsifrlyq tehnologiialar men ziiatkerlik júie, meditsinalyq bilim berý men ǵylym, farmatsiia, memlekettik-jekeshelik áriptestik jáne basqa da yntymaqtastyqty nyǵaitý, Qazaqstan men Ózbekstannyń Densaýlyq saqtaý ministrlikteri arasyndaǵy densaýlyq saqtaý máseleleri jóninde birlesip kelisim ázirleý qajettigin aitty.
«Issapardyń alǵashqy kúni úkimettik delegatsiia músheleri akademik A.Vahidov atyndaǵy respýblikalyq mamandandyrylǵan ǵylymi-praktikalyq meditsinalyq ortalyqqa bardy. Munda júrek jáne qan tamyrlary, asqazan-ishek joldary, baýyr jáne uiqy bezi, ókpe jáne mediastinalyq organdar aýrýlary bar naýqastarǵa joǵary bilikti jalpy jáne mamandandyrylǵan hirýrgiialyq kómek kórsetiledi», - dedi QR Densaýlyq saqtaý ministrliginen.
Sondai-aq, olar 2020 jyly pandemiiamen kúresý úshin salynǵan Zangiotin aýdanyndaǵy №1 jáne №2 mamandandyrylǵan juqpaly aýrýlar aýrýhanalarynyń qyzmetimen tanysty. Nysan bir ýaqytta 10 myń adam qabyldaidy jáne COVID-19 shaldyqqan naýqastardy emdeýge, karantinge muqtaj shetelden oralǵan Ózbekstan azamattaryn ornalastyrýǵa arnalǵan. Sonymen qatar, delegatsiia «Dentafill» JShQ farmatsevtikalyq zaýytyn aralady.
Aita keteiik, 2020 jylǵy qarashada Qazaqstan men Ózbekstan arasyndaǵy yntymaqtastyqty damytý jónindegi Jol kartasy qabyldandy. Oǵan farmatsevtika ónerkásibi salasyndaǵy ónerkásiptik kooperatsiia máseleleri engizildi. Atap aitqanda: Shymkent qalasynda 2020-2022 jyldary dárilik jáne gigienalyq quraldar óndiretin zaýyt salý; 2021 jyly Ózbekstan aýmaǵynda farmatsevtikalyq ónim shyǵaratyn birlesken kásiporyndar qurý.
