Aqtóbe oblysynda burynǵy qaiyn atasyna qorqytý sipatyndaǵy habarlamalar jibergen jigit qoǵamdyq jumysqa tartyldy, dep habarlaidy «Diapazon» basylymy.
Oqiǵa aýyldyq eldi mekenderdiń birinde bolǵan. Tergeý málimetinshe, 27 jastaǵy azamat burynǵy áieliniń ákesine telefon shalǵanymen, ol tutqany kótermegen. Osydan keiin ashýǵa býlyqqan jigit oǵan qoqan-loqy mazmunyndaǵy 14 aýdiohabarlama joldaǵan.
Qaýiptengen er adam óz ómirine alańdap, politsiiaǵa júgingen. Is barysynda psihologiialyq-filologiialyq saraptama júrgizilip, habarlamalarda jábirlenýshige ziian keltirý nietiniń anyq baiqalatyny rastalǵan.
Aiyptalýshy jazbalardaǵy daýys ózine tiesili ekenin joqqa shyǵarmaǵan. Ol mundai áreketke ashýmen barǵanyn aityp, eshkimge naqty ziian keltirý oiy bolmaǵanyn alǵa tartqan. Alaida bul ýájder onyń jaýapkershilikten qutylýyna negiz bolmady.
Sot jábirlenýshiniń qaýiptenýine jetkilikti negiz bolǵanyn eskerip, aiyptalýshyny qylmystyq teris qylyq jasaǵan dep tanydy. Nátijesinde oǵan 60 saǵat qoǵamdyq jumysqa tartý jazasy taǵaiyndaldy.
