- «BJZQ» AQ tóraǵasy Rýslan Erdenaev pen «BJZQ» AQ táýekelderdi basqarý departamentiniń basshysy Musa Bahtovtyń qorǵaýshysy Aleksandr Bloh sýdiadan kúdiktilerdi kepilge bosatýdy ótindi, dep habarlaidy Ult.kz tilshisi QazAqparat agenttigine silteme jasap.
«Ol qylmys jasaǵan joq. Arada azamattyq-quqyqtyq mámile bolǵan. Onyń zańdy-zańsyzdyǵyn tek sot sheshedi. Bul quqyq qorǵaýshylardyń quzyryndaǵy nárse emes», - dedi ol.
Onyń aitýynsha, qazir qandai bolmasyn qorytyndy shyǵarýǵa áli erte.
«Bahtov múlde tek óz mindetin oryndaǵany úshin ustalyp otyr. Ol óz laýazymyna sai áreket etti», - dedi ol.
«Aqsha bankte. Emitent kelisimdi buzyp, aqshany basqa jaqqa jumsady. Aqshany bankten bas bankir bir telefon qońyraýymen ala salady. Aqsha eshqaida ketken joq. Zeinetaqy shashylǵan joq. BJZQ aktivteri jumsaldy. Mámile óte tiimdi. Jylyna 19 paiyz. Mámile altyn rýdaly rýdnikpen kepildendirilgen. Onda altyn kólemi 60-220 tonna bolýy múmkin», - dedi advokat.
Qorǵaýshy Erdenaevtyń áreketin qylmystyq emes ekendigin dáleldeýge tyrysyp jatyr.
«Men túsiner edim. Eger ony ustap alsa, ol urlady. Aqsha joq emes. Shotta jatyr ǵoi. Demek ony eshkim urlaǵan joq. Eger defolt bolǵan jaǵdaida aqsha ornyna keledi. Nege ony eshkim eskermeidi», - dedi ol.
Onyń aitýynsha, qazir Erdenaevtyń 90 mln teńge turatyn páteri kepilge qoiylǵan.
«QR zańnamasy boiynsha kepilge eń kemi 1 mln 600 teńge qoiýǵa bolady. Al Bahtovqa 13 mln teńge qoidym», - dedi qorǵaýshy.
Al Naizaǵarin men Kenjebaevtyń qorǵaýshysy Ǵalym Nurpeiisov te qolastyndaǵylardy kepilge bosatýdy suramaq.
Eske salsaq, Ulttyq qaýipsizdik komitetiniń Almaty qalasyndaǵy departamenti BJZQ-nyń quny 5 mlrd teńge bolatyn kelisim-shartyn tekserip jatyr.
Sotqa deiingi tergeý oryndary R.Erdenaev pen ózge de tulǵalarǵa menshikke qatysty QR QK 189 babynyń 4 tarmaǵy boiynsha aýyr qylmys jasady dep aiyp taǵyp otyr.
21 jeltoqsannan bastap Ulttyq banktiń qatysýymen «Biryńǵai jinaqtaýshy zeinetaqy qory» AQ-nyń áreketi tekserilip jatyr. Tekserý BJZQ aktsionerleriniń óz aktivterin investitsiialaýǵa qatysty bolyp otyr. BJZQ óz kezeginde qarjy jymqyrýyna qatysty qaýesetti joqqa shyǵardy.
