Búgin saltanatty túrde ashylǵan Quryq portyndaǵy mýltimodaldyq kólik habyna Qorǵas qurǵaq portynan alǵashqy júk jiberildi, dep habarlaidy QazAqparat tilshisi.
Qyzanaq pastasy tielgen 82 konteiner Quryq portyna jóneltilip, odan ári Grýziianyń Poti porty arqyly Italiiaǵa jetkiziledi. Búgin qurǵaq port territoriiasynda Memleket basshysy Nursultan Nazarbaevtyń qatysýymen tikelei telekópir uiymdastyryldy.
«Dál osy sátte Qorǵas qurǵaq porty Quryq porty baǵytynda odan ári Transkaspii dálizimen Eýropaǵa turaqty túrde konteiner poiyzyn baǵyttamaq. Bul logistikalyq tizbek - Qytai, Eýropa, Kavkaz elderi úshin óte tiimdi. Transkaspii halyqaralyq dáliziniń mýltimodaldy konteinerlik marshrýttaryn biriktiretin poiyzdy jóneltýge ruqsat berýińizdi suraimyz», - dedi Qorǵas shyǵys qaqpasy erkin saýda aimaǵy basqarý kompaniiasynyń bas direktory Murat Baimuhanbetov.
Elbasynyń maquldaýynan soń qyzanaq pastasy tielgen alǵashqy 82 konteiner Quryqqa jiberildi.
Búginde Qorǵas qurǵaq porty ákimshiligi men Quryq porty ózara túsinistik týraly memorandýmǵa qol qoiǵan.
«Biz osy baǵytta Quryq portymen IT salasyndaǵy múmkinshilikterimizdi biriktiremiz. Bul klientter úshin óte yńǵaily bolmaq. Bizge túsken aqparat avtomatty túrde Quryqqa jiberilip otyrady. Biz Transkaspii marshrýtyn damytý qaýymdastyǵy aiasynda Quryq portymen tyǵyz jumys istep jatyrmyz. Búgin alǵashqy júk poiyzy Grýziiadaǵy Poti portyna jetkizilip, odan ári Italiiaǵa jóneltiledi», - dedi KTZE Khorgos Gateway JShS bas direktory Jaslan Hamzin.
Osy aitýly sharaǵa onnan astam elden kelgen kólik-logistikalyq kompaniialardyń ókilderi qatysty. Olardyń arasynda Ázerbaijan, Iran, Qytai, BAÁ, Resei, Tájikstan, Túrkimenstan, Túrkiia, Ózbekstan jáne basqa da elderdiń mamandary bar.
Aita keteiik, Quryq porty Kaspii teńiziniń shyǵys jaǵalaýynda ornalasqan. Aýa raiynyń qolailylyǵyna bailanysty portta qysy-jazy toqtaýsyz avtokólik pen temirjol paromy jumys isteidi. Kaspii teńizi arqyly batys baǵdarda eksporttyq áleýetti kúsheitý úshin parom qyzmetin qoldaný jaiy Memleket basshysynyń 2014 jylǵy 11 qarashadaǵy «Nurly jol - Bolashaqqa bastar jol» atty Joldaýynda aityldy.
.jpeg)