Qytaimen eki ortadaǵy "Qorǵas" halyqaralyq saýda ortalyǵynda qordalanǵan másele áli kúnge sheshimin tappai keledi. Jurt aqshasyn tólegen avtobýsqa qaitarda syimai, júgimen dalada qalatyndaryna narazy. Iaǵni, jetýi ońai bolǵanymen, qaitýlary qiyn. Iin tiresken kezekte kópshilik ishke kirý úshin, tipten bir-birin taptap ketýden de taiynbaidy. Al, osy aýmaqtaǵy tasymalǵa jaýapty mekeme bul jaǵdaidyń kóktem kele ońalatynyn aityp sendirýge tyrysty. Bul týraly "KTK" habarlady.
Telearna tilshisiniń málimetinshe, qazaq-qytai shekarasyndaǵy halyqaralyq saýda ortalyǵyna kún saiyn ortasha eseppen 2 myńǵa jýyq adam barady. Saýda ortalyǵyna baryp-qaitýdyń quny myń jarym teńge eken. Birden eki baǵyttyń biletin alýǵa mindettisiz. Sharýasyn erte jaiǵastyrýdy kózdegender tań atysymen kedennen jeti shaqyrym jerdegi bazarlarǵa mynadai eski avtobýspen attanady. Kópshilik túski úsh-tórtke deiin kerek-jaraǵyn alyp, qaitýǵa qamdanady. Naǵyz qarbalas ta sol sátte bastalady.
Qystyń kózi qyraýda qaltyraǵandar arasyndaǵy talasta úlken-kishi degen túsinik joq. Jerde súringendi súieýdiń ornyna ústinen attap, bir-birin taptap ótýden de taisalmaityndai. Arǵy betke ótý úshin keide 3-4 saǵattap kezegin kútetinderi de bar. Halyqaralyq saýda ortalyǵy aýmaǵynda bar-joǵy 25 avtobýs júredi eken. Mundai kezekten qajyǵandar, tólegen aqshalarynyń esh ketetindigin aitady. Bul jaǵdaidy osy aýmaqtaǵy taksister ońtaily paidalanyp jatyr. Kezekte turǵysy kelmeitinder amaldyń joqtyǵynan, qymbat bolsa da júkterin taksige tiep, eki ese aqsha tólep qaitýǵa májbúr.
"Halyqqa jaǵdai jasaýlaryń kerek. Anandai avtobýs bar. Asty bar. Ústinde adam otyratyn. Bir adamnyń ishine neshe adam otyrady. Ras pa? Biz it bolyp júrmiz mine. Biz jasymyz 50-den asyp 60 -qa jaqyndaǵan ólýimiz kerek pe Qazaqstanda?", - deidi Jarkent qalasynyń turǵyny Zeineshgúl Qorǵasbaeva.
"Eki qolymyzǵa eki júk ustap avtobýstarǵa otyra almaimyz. Júre almaimyz. Júrgizbeidi bizdi. 1500 teńge tóleimiz. Biraq, biz avtobýsqa otyra almaimyz. Taksilerde sol. Ana jaqqa 1500 tóleimiz, taksilerge otyrý úshin de sonsha tóleý kerek. Biz sonsha aqsha shyǵara almaimyz ǵoi", - deidi taǵy bir jarkenttik Aisha Taiyrova.
Halyqaralyq ortalyqtyń basshylyǵy bul bylyqtan habardar. Tyǵyryqtan shyǵýdyń da jolyn qarastyrypty-mys. Kóktemde áýejaidaǵydai júkti ótkizip, arǵy betten kútip alatyn júieni iske qosýdy josparlap otyr. Al, oǵan deiin kezekte turǵysy kelmeitinder gid qyzmetiniń kómegine júginse bolady deidi.
"Olar kezeksiz ótedi. Týristik toptarǵa arnaiy dálizder qarastyrylǵan. Aldyn ala keletin jáne qaitatyn ýaqyttaryn eskertýi tiis. Árine, qyzmet quny sál qymbat bolýy múmkin. Biraq, ýaqyttaryn joǵaltqysy, kezekte turǵysy kelmeitinder osy gidterdiń qyzmetin paidalanady", - deidi "Qorǵas" Shekara mańy yntymaqtastyǵy halyqaraly ortalyǵy AQ prezidenti Qaharman Jazin.
Jańa júie kóktemde iske qosylýy tiis. Qazirgi eski 25 avtobýstyń ornyn zamanaýi 50 qoǵamdyq kólik basady dep kútilip otyr. Halyqaralyq ortalyqtyń basshylyǵy "sáýir kelip táýir bolaryna" senimdi. Al, oǵan deiin jurtshylyq kedendegi keptelis pen keristen ázirge arylmaityń syńaily.
