"Qorǵas isindegi" negizgi aiyptalýshylardyń biri bolǵan Ulttyq qaýipsizdik komitetiniń burynǵy qyzmetkeri Talǵat Jaqaev pen Almaty oblysy keden qyzmetiniń burynǵy basshysy Qurmanbek Artyqbaev bostandyqqa shyqty. Olardyń ótelmegen jazasyn aiyppulǵa aýystyrdy.
Qazaqstannyń birneshe aqparat quralynda jariialanǵan bul málimetti Shyǵys Qazaqstan oblystyq sotynyń baspasóz qyzmeti rastady, dep habarlaidy Azattyq.
Qazaqstannyń qylmystyq ister boiynsha mamandandyrylǵan aýdanaralyq áskeri soty "Qorǵas isi" boiynsha aiyptaý úkimin 2014 jyly 12 sáýirde shyǵarǵan.
Sot aiyptaýy boiynsha, "Qorǵas" keden beketindegi alaiaq áreketterdi Ulttyq qaýipsizdik komitetiniń joǵary laýazymdy tulǵalary jasyryp kelgen. Ózge de daýazymdy tulǵalarmen qatar, UQK polkovnigi Talǵat Jaqaev 17 jylǵa, Almaty oblysynyń kedendik baqylaý departamentiniń burynǵy bastyǵy Qurmanbek Artyqbaev 14 jylǵa bostandyǵynan aiyrylǵan.
2011 jyly Qazaqstannyń sol kezdegi ekonomikalyq jáne jemqorlyq qylmyspen kúres agenttigi Almaty oblysyndaǵy "Qorǵas" jáne "Qaljat" keden beketi men "Alataý" tehnikalyq qyzmet kórsetý ortalyǵyn tekserip, 100-ge jýyq adamnan turatyn qylmystyq top áshkerelengenin jariialaǵan. "Qorǵas isi" derekterine qaraǵanda, sottalǵandar Qytai shekarasynan kontrabandalyq taýar ótkizýmen birneshe jyl ainalysyp kelgen. Taýarlardy Qazaqstan jáne Qyrǵyzstan bazarlaryna jibergen.
"Qorǵas" – Qazaqstan men Qytai shekarasyndaǵy negizgi keden beketteriniń biri. Qazaqstan, Qyrǵyzstan jáne Reseige Qytaidan jetkiziletin júktiń úlken bóligi osy beket arqyly ótedi.
