QR Qorǵanys ministrligi Qaraǵandy oblysynda Sý-30SM ushaǵynyń apatqa ushyraýyna yqtimal sebepterdiń birin atady, dep habarlaidy QazAqparat tilshisi.
«Qaraǵandy oblysynda Sý-30SM ushaǵynyń apatqa ushyraý sebebin tekserý jóninde arnaiy qurylǵan komissiia barlyq oryn alýy múmkin nusqany qarastyryp jatyr. Eń yqtimal nusqanyń biri – bul bir top qustyń áskeri bortqa soqtyǵysýy. Qustar, ásirese iri qustar aviatsiia úshin óte qaýipti. Týrbinaly ushaq jolynda kedeskenniń bárin ishke qarai tartady. Kúshtik qurylǵyǵa tap bolǵan iri qustar qozǵaltqyshty barynsha zaqymdap, ony isten shyǵarady. Mundai soqtyǵýlar negizinen ushý jáne qoný kezinde oryn alady. Zamanaýi ushaqtardyń korpýsy qustardyń soqqysyna tótep bergenimen qozǵaltqyshy shydamaidy. Qozǵaltqyshqa qustar túsken kezde ol isten shyǵady. Al oǵan bir top qus túsetin bolsa, onda eki qozǵaltqysh birden isten shyǵyp qalady. Mundai jaǵdailar aviatsiiada óte qaýipti sanalady. Óitkeni, ushaqtar qozǵaltqyshtyń biri búlinbese ushýyn jáne qonýyn jalǵastyra alatyndai jasalǵan», - dedi Qorǵanys ministrligi.
Vedomstvo málimetinshe, qazirgi áýejailar men áskeri aerodromdar qustardy úrkitýge arnalǵan arnaýly qurylǵylarmen jabdyqtalǵan. Jalpy, búkil álemde aviatsiianyń qustarmen soqtyǵysý problemasy túbegeili sheshilmegen. Sondyqtan mundai oqiǵalar jii bolyp turady. Statistikalyq derekterge qaraǵanda jyl saiyn álemde qustardyń áýe kemeleriniń soqtyǵysýynyń 5 myńnan astam deregi tirkeledi. Aita keterligi, azamattyq ushaqqa qaraǵanda joiǵysh ushaqtardyń jyldamdyǵy birshama joǵary. Sondyqtan qustarmen qaqtyǵysqan kezde áskeri ushaqtar qatty zardap shegedi.
«Ushqyshtar ómirlerine anyq qaýip tóngenge deiin ushaqty basqarý úshin barlyq múmkindikti jasady. Ushaq basqarýǵa kónbei, kabina tútinge tolǵannan keiin, azamattyq turǵyndarǵa, sonymen qatar jerdegi azamattyq nysandarǵa qaýiptiń joqtyǵyna kóz jetkizgennen keiin ǵana ushaqty tastap shyǵýǵa sheshim qabyldady. Ushqyshtar ushaqtty apatty jaǵdaida tastap ketý júiesin barynsha tómen tiiktikte paidalandy. Olar ushaqty barynsha saqtap qalýǵa, áskeri bólimniń arnaýly qutqarýshylar kútip turǵan aerodromǵa qondyrýǵa tyrysty», - delingen taratylǵan aqparatta.
Eki ushqysh ta kásibi mamandar, 2 synyp biliktiligi bar. Aqtóbe qalasyndaǵy Áýe qorǵanysy kúshteri Áskeri institýtyn bitirgen. Ekeýi de 1 500 saǵatqa jýyq ushqan.
