QR Qorǵanys miinstrligi Shymkenttegi áskeri qyzmetshi men onyń aǵasynyń ólimine qatysty pikir bildirdi, dep habarlaidy "Ult aqparat".
«Shymkenttegi kópqabatty úilerdiń birinde jaldamaly páterde áskeri qyzmetshi men onyń aǵasy jazataiym oqiǵadan kóz jumdy. Áskeri qyzmetshi № 556/52 áskeri bóliminiń ofitseri bolǵan, onyń aǵasy – Shymkenttegi «Giper Haýs» saýda ortalyǵynda satýshy bolyp jumys istegen. Iaǵni, birqatar BAQ habarlaǵan eki áskeri qyzmetshiniń ólimi týraly aqparat shyndyqqa janaspaidy. Qaiǵyly oqiǵa jumystan tys ýaqytta bolǵan», - dep túsindirdi ministrliktiń baspasóz qyzmeti.
Buǵan deiin, Shymkentte eki adamnyń iisten ýlanyp, kóz jumǵany habarlanǵan edi.
«Qaztransgaz Aimaq» AQ málimetinshe, qaiǵyly jaǵdai búgin túnde Túrkistan kóshesindegi úilerdiń birinde bolǵan. Tańǵy saǵat 07:51 shamasynda TJD kezekshi bólimine 24/4 úidegi 83-páterden 2 adamnyń máiiti tabylǵany týraly habarlama túsken.
«Aldyn ala boljam boiynsha, 1994 jáne 1992 jyly týǵan eki adam gazdyń iisine ýlanyp qaza bolǵan. Oqiǵa ornyna jetken apattyq brigada tekserý barysynda ashanada 2 konforly gaz plitasy men «DUBAI» sý jylytqyshy ornatylǵanyn anyqtady. Alaida sý jylytqysh peshtiń tútin shyǵaratyn qubyry (gofra) ajyrap ketken. Qazir eki turǵynnyń ólimine naqty ne sebep bolǵany anyqtalýda» delingen habarlamada.
