Qarýly Kúshterdiń bas shtaby LGBT ókilderiniń áskerde qyzmet etýine qatysty pikir bildirdi, - dep habarlaidy Tengrinews.kz.
"LGBT ókilderi áskerde qyzmet ete ala ma jáne adamnyń jynystyq baǵdary áskerge shaqyrýdan bas tartýǵa sebep bolýy múmkin be" - degen suraq qoiyldy OQK brifinginde.
"LGBT ókilderi - Qazaqstan Respýblikasyndaǵy barlyq azamatpen teń jáne olardyń merzimdi áskeri qyzmetten ótýine eshqandai quqyqtyq kedergi joq. Olar qyzmet ete alady. Bizde Konstitýtsiia boiynsha eshkimdi kez kelgen mán-jaiǵa qatysty kemsitýge bolmaidy", - dep jaýap berdi Qazaqstan Qarýly Kúshteri bas shtaby Uiymdastyrý-jumyldyrý jumysy departamentiniń bastyǵy Sáken Júsipov.
Jýrnalist komissiia adamnyń jynystyq baǵyt-baǵdaryn eskeredi jáne sonyń negizinde sheshim qabyldai alady degen Jelidegi habarlamalar týraly aitty.
"Maǵan kún saiyn ondaǵan qońyraý túsedi, ata-ana da, ásker jasyndaǵy azamattar da habarlasady. Biraq olardyń bas tartqan jaǵdaiyn estimeimin. Óitkeni sheshim qabyldaityn dárigerler komissiiasy nemese shaqyrý komissiiasy máseleni jan-jaqty qaraidy. Biraq bar zańdardy eshkim buzbaidy. Taǵy bir suraq - densaýlyqta basqa aýytqýlar bolsa, onyń ishinde - psihikalyq. Biraq taǵy da aitamyn, mundai sanattaǵy azamattardy Qarýly Kúshterde, basqa da áskerler men áskeri quralymdarda qyzmet etýge shaqyrýdan bas tartýǵa eshqandai zańdyq kedergi joq. Eger naqty jaǵdai bolsa, men árbir azamatpen ózim sóilesip, osy máselege qatysýǵa daiynmyn", - dep sendirdi Júsipov.
