Qorǵanys ministri Rýslan Jaqsylyqov Qazaqstan Qarýly Kúshteriniń daiyndyq deńgeii týraly pikir bildirdi, dep habarlaidy QazAqparat.
«Biz – sarbazbyz. Biz óz memleketimizdi qandai jaǵdaida da qorǵaýǵa mindettimiz. Men Joǵarǵy Bas qolbasshynyń tapsyrmasy boiynsha Qarýly kúshterdiń daiyndyq deńgeiin tekserdim. Jaqynda ǵana oqý-jattyǵýdy aiaqtadyq, qazir taldaý júrgizip jatyrmyz. Qazaqstan halqy tynysh uiyqtai alady degim keledi. Problemalar da bar – olar sheshilip jatyr. Jaýyngerlik múmkindikterdi arttyrý, materialdyq-tehnikalyq qamtamasyz etý protsesteri júrip jatyr. Qazaqstan Respýblikasynyń Qarýly Kúshteri basqa áskerler men áskeri qurylymdar siiaqty memleketimizdiń konstitýtsiialyq qurylysy men aýmaqtyq tutastyǵyn qorǵaý boiynsha óz mindetin oryndaidy», - dedi Qorǵanys ministri Májilis otyrysynan keiin tilshilerge bergen suhbatynda.
Sonymen birge ministr elimizde «Soltústik» óńirlik qolbasshylyǵy nege joq degen suraqqa jaýap berdi.
«Ulttyq qaýipsizdik boiynsha tutas strategiia bar, Qarýly Kúshterdi qurý tujyrymdamasy bar, strategiialyq baǵyttar bar. Qajettilik bolyp jatsa qurylady («Soltústik» óńirlik qolbasshylyq – red.). Qazirgi ýaqytta mundai óńirlik qolbasshylyq qurýdyń qajeti joq dep esepteimiz. Óitkeni bul aimaq Astana óńirlik qolbasshylyǵynyń quramyna kiredi», - dep túsindirdi Jaqsylyqov.
