قورعانىس مينيسترٸ رۋسلان جاقسىلىقوۆ قازاقستان قارۋلى كٷشتەرٸنٸڭ دايىندىق دەڭگەيٸ تۋرالى پٸكٸر بٸلدٸردٸ, دەپ حابارلايدى قازاقپارات.
«بٸز – ساربازبىز. بٸز ٶز مەملەكەتٸمٸزدٸ قانداي جاعدايدا دا قورعاۋعا مٸندەتتٸمٸز. مەن جوعارعى باس قولباسشىنىڭ تاپسىرماسى بويىنشا قارۋلى كٷشتەردٸڭ دايىندىق دەڭگەيٸن تەكسەردٸم. جاقىندا عانا وقۋ-جاتتىعۋدى اياقتادىق, قازٸر تالداۋ جٷرگٸزٸپ جاتىرمىز. قازاقستان حالقى تىنىش ۇيىقتاي الادى دەگٸم كەلەدٸ. پروبلەمالار دا بار – ولار شەشٸلٸپ جاتىر. جاۋىنگەرلٸك مٷمكٸندٸكتەردٸ ارتتىرۋ, ماتەريالدىق-تەحنيكالىق قامتاماسىز ەتۋ پروتسەستەرٸ جٷرٸپ جاتىر. قازاقستان رەسپۋبليكاسىنىڭ قارۋلى كٷشتەرٸ باسقا ەسكەرلەر مەن ەسكەري قۇرىلىمدار سيياقتى مەملەكەتٸمٸزدٸڭ كونستيتۋتسييالىق قۇرىلىسى مەن اۋماقتىق تۇتاستىعىن قورعاۋ بويىنشا ٶز مٸندەتٸن ورىندايدى», - دەدٸ قورعانىس مينيسترٸ مەجٸلٸس وتىرىسىنان كەيٸن تٸلشٸلەرگە بەرگەن سۇحباتىندا.
سونىمەن بٸرگە مينيستر ەلٸمٸزدە «سولتٷستٸك» ٶڭٸرلٸك قولباسشىلىعى نەگە جوق دەگەن سۇراققا جاۋاپ بەردٸ.
«ۇلتتىق قاۋٸپسٸزدٸك بويىنشا تۇتاس ستراتەگييا بار, قارۋلى كٷشتەردٸ قۇرۋ تۇجىرىمداماسى بار, ستراتەگييالىق باعىتتار بار. قاجەتتٸلٸك بولىپ جاتسا قۇرىلادى («سولتٷستٸك» ٶڭٸرلٸك قولباسشىلىق – رەد.). قازٸرگٸ ۋاقىتتا مۇنداي ٶڭٸرلٸك قولباسشىلىق قۇرۋدىڭ قاجەتٸ جوق دەپ ەسەپتەيمٸز. ٶيتكەنٸ بۇل ايماق استانا ٶڭٸرلٸك قولباسشىلىعىنىڭ قۇرامىنا كٸرەدٸ», - دەپ تٷسٸندٸردٸ جاقسىلىقوۆ.
