QR Qorǵanys ministri Nurlan Ermekbaev Arystaǵy jarylys týraly qoǵamdyq rezonans týdyrǵan pikirge túsinikteme berdi, dep habarlaidy QazAqparat tilshisi.
«Jaǵdaidy ádil baǵalaý úshin jaýapkershilik pen kináni shatastyrmaǵan jón. Men jaýapkershilikten qashpaimyn. Al kináni sot anyqtaidy. Buǵan deiin birneshe ret óz atymnan, áskeriler atynan Arys turǵyndaryna jaǵdaiǵa bailanysty ókinish bildirdim. Qaraly úige kóńil aittym, keshirim suradym. Áli de zardap shekkendermen júzbe-júz kezdesip, keshirim suraýǵa daiynmyn», - dedi ministr Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, áskeri adamnyń mindeti - ádemi sóz sóilep, popýlizmmen ainalysý emes, naqty ister arqyly jaǵdaidy túzetý.
«Beitanys jigit kelip, amandaspai, ózin tanystyrmai, ekonomikaǵa nuqsan keltirdiń dep aiyptasa jáne kamera aldynda keshirim suraýdy talap etse, ár adam ártúrli jaýap qatar edi. Men de beitanys adamǵa keshirim suraýdyń negizi joq dep jaýap berdim. Qaitalap aitamyn, men kamera aldynda emes, zardap shekken turǵyndardan keshirim suradym jáne taǵy suraýǵa daiynmyn», - dedi N. Ermekbaev.
Sonymen birge, ministr qoǵamdyq rezonans týdyrǵan «Tabiǵi nárse» sózi týraly túsinikteme berdi.
«Men orys mektebin bitirgenmin. 1 synyptan 10 synypqa deiin qazaq tilinde birde-bir sabaq almaǵanmyn. Sondyqtan, qazaq tilin múltiksiz bilemin dep aita almaimyn. Biraq, elimizde qazaq tilin jetik biletin adamdar «tabiǵi nárse» sózin orysshaǵa durys aýdarmady. Sózdikte «tabiǵi» sózi eń aldymen «estestvennyi» dep aýdarylady. Aitqym kelgeni, bólim komandirin kináli dep aitýǵa bolmaidy. Sebebi, árbir áskeri nysanda qaýip-qater bolady. Munda salǵyrttyq nemese nemqurailyq, ádeii jasalǵan nemese tehnikalyq sebepter bolýy múmkin. Ony arnaiy komissiia anyqtaidy», - dep óz sózin túiindedi Qorǵanys ministri.
Eske sala ketsek, Arys qalasyndaǵy áskeri bólimniń qoimasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskeri qyzmetshi. 170-ke jýyq adam zardap shekti. 20-ǵa jýyq úi, 9 qora-qopsy janyp, dalaly aýmaqta 14 oshaq tutandy. Úi-jailar men ǵimarattardyń 80-90 paiyzyna ártúrli deńgeide zaqym keldi. Birqatar óńirde shuǵyl jeliler quryldy.
Túrkistan oblysyna arnaiy barǵan Qazaqstan Prezidenti Qasym-Jomart Toqaev Arystaǵy áskeri bólimshedegi oq-dári qoimasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondai-aq Elbasy Nursultan Nazarbaev Arystaǵy jaǵdaiǵa alańdaýshylyq bildirdi. Tuńǵysh Prezidenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.
Úkimet otyrysynda Premer-Ministr Asqar Mamin jarylys saldarynan kóz jumǵandardyń týǵan-týystaryna kóńil aityp, turǵyndarǵa barlyq kómek kórsetiletinin aitty. Keltirilgen zalaldyń kólemi baǵalanyp, Úkimet rezervinen aqsha bólinedi.
Evakýatsiialaý kezinde myńnan astam ata-ana balarynan kóz jazyp qaldy. Sábilerdiń barlyǵy týys-týǵandaryna din-aman tapsyryldy.
