Qordai aýdanyndaǵy oqiǵa bailanysty 25-ten astam qylmystyq is qozǵaldy. Bul týraly Ishki ister ministrligi Tergeý departamentiniń bastyǵy Sanjar Ádilov málim etti, dep habarlaidy "Ult aqparat".
«Qylmystyq isterdi tergeýge toqtalsaq, qazirgi ýaqytta Jambyl oblysy Politsiia departamentiniń aýmaqtyq bólimsheleri 25-ten astam qylmystyq is qozǵady. Osy turǵyda jappai tártipsizdik, jappai tártipsizdikti uiymdastyrý men oǵan qatysý baby qamtylǵan. Sodan keiin jappai tártipsizdikke qatysýǵa úndeý jasaý boiynsha qylmystyq is qozǵaldy. Altydan astam is buzaqylyq faktilerine qatysty qozǵaldy. Úsh qylmystyq is bótenniń múlkin zaqymdaý boiynsha, 10 is kisi óltirý faktisine, sondai-aq eki is adam óltirýge oqtalýǵa qatysty qozǵaldy», - dedi Ádilov Úkimet úiinde tilshiler saýalyna jaýap bere otyryp.
Onyń sózine qaraǵanda, búginde Bas prokýratýrasynyń, Ishki ister ministrliginiń jáne basqa da quqyq qorǵaý organdarynyń vedomstvoaralyq tergeý toby jappai tártipsizdik, adam óltirý boiynsha sotqa deiingi tergeýdi júrgizýde. Atalǵan ister boiynsha qazirgi ýaqytta qamaýǵa alynǵan adamdar bar.
«Zanama talaptaryna sáikes, osy kezeńde aldyn ala tergeý málimetterin jariia etýge bolmaidy. Kezek kúttirmeitin tergeý amaldary júrip jatyr», - dedi Sanjar Ádilov.
Eske salaiyq, 7 aqpan kúni Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles boldy. QR Prezidenti Qasym-Jomart Toqaev buzaqylyq sipattaǵy jappai tóbelesti arandatýshylar óz paidasyna qoldanbaq bolǵanyn málimdedi.
Sondai-aq vitse-premer Berdibek Saparbaevtyń tóraǵalyǵymen úkimettik komissiia qurylatynyn, qaza bolǵandardy jerleý, zardap shekkenderge kómektesý jumystary uiymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komitetine tiisti tapsyrma berildi.
