Dúisenbi kúni, 10 aqpanda Qordai aýdanynyń Aýqatty aýylynda QR Premer-Ministriniń orynbasary Berdibek Saparbaev bastaǵan Úkimet komissiiasy Qordai aýdanynyń Qarakemer, Masanchi, Aýqatty, Sortóbe, Bulan batyr aýyldarynyń aqsaqaldarymen kezdesý ótkizdi, dep habarlaidy "Ult aqparat" primeminister.kz saityna silteme jasap.
Jiynǵa oblys ákimi Asqar Myrzahmetov, aýyl aqsaqaldary, bedeldi turǵyndar, ardagerler keńesteriniń tóraǵalary, ortalyq memlekettik organdardyń basshylary, Parlament depýtattary qatysty.
Kezdesýde problemalyq máselelerdi sheshý joldary, qoǵamda kelisim men birlikti saqtaý talqylandy. Aqsaqaldar jastarmen rýhani tárbie jumystarynda kemshilikter bar degen toqtamǵa keldi, osynyń saldarynan turmystyq kikiljiń barsha jurtqa jariia bolǵan oqiǵaǵa ainaldy.
Aqsaqaldar atalǵan eldi mekenderdi qamtityn birlesken Aqsaqaldar keńesin qurý týraly kelisimge keldi. Bul aýyldardaǵy turmystyq problemalardy aýyl aqsaqaldary ortaq Keńeste sheshetin bolady. Olar jastarmen tárbie jumystaryn júrgizip, Qordai aýdanynda turatyn barlyq ulttardyń arasynda birlik rýhyn nyǵaitý úshin birlesken mádeni-sporttyq sipattaǵy oiyn-saýyq sharalaryn uiymdastyrý mindettemelerin aldy.
«Biz bala kezden dospyz, birge óstik, birge jumys istedik, qaiǵyda da, toida da birge júremiz. Jastar bir-birimen aralasýy kerek, sonda olar bir-birine jaqyndai túsedi. Biz 11 aqpanda Sortóbede bas qosýǵa kelistik. Biz óz aqsaqaldarymyzdy, olar ózderiniń aqsaqaldaryn alyp keledi. Aldaǵy ýaqytta qaitalanbaýy úshin týyndaǵan barlyq máselelerdi talqylaimyz», — dedi qoǵam qairatkeri, aýdandyq Ardagerler keńesiniń tóraǵasy Ábdibek Seiilhanov.
Masanchi aýylynyń turǵyny Lýý Ishar da qoǵamda birliktiń saqtalýyna qatysty óz oiyn jetkizdi.
«Ústel basynda bas qosyp, máselege núkte qoiý úshin barlyq qurmetti aqsaqaldar jinalady. Arǵy kúni Masanchide meshitte bas qosamyz. Nelikten meshitte? Biz barlyǵymyz musylmanbyz, dostyqty nyǵaityp, Quran oqyp, osyndai jaǵdailar qaitalanbaýy úshin bata berý úshin meshitte jinalamyz. Júz qyryq jyldai birge tatý ómir súrip jatyrmyz, adamdyq qasietteri joqtardyń kesirinen osyndai jaǵdai oryn aldy. Bul biz úshin óte aiypty jaǵdai boldy. Biz bul máselelerdiń barlyǵyn sheshýge tyrysamyz», — dedi ol.
Osy aýdannan shyqqan kásipkerler týǵan ólkesin qalpyna keltirý jáne damytý úshin qarjylai jáne materialdyq kómek kórsetýge niet bildirdi.
«Meni týǵan aýylymnyń jaǵdaiy asa tolǵandyrady. Men munda balabaqsha, sport keshenin saldym. Qazir saýyqtyrý ortalyǵyn salyp jatyrmyn. Biznesmenderdi ózderiniń týǵan aýyldaryn abattandyrýǵa shaqyramyn. Ókinishke orai, bul burynnan bar másele. Aǵartýshylyq jumystar júrgizip, birlesken mádeni-buqaralyq sharalar ótkizip, jergilikti halyqtyń basyn biriktirý kerek», — dedi biznesmen, Qarakemer aýylynyń týmasy Qairat Moldaseiitov.
